J'aime à m'assière au bord d'la grève,
Jetant mes r'gards parsus la mer,
Entendre un chant qui l'âme enlève,
Le son des fliots quand veint le seir.
J'aime à entendre l'cri d'la mauve,
Et veir au pliein pêquir l'sandron
Qui dans ses creux se cache et s'sauve,
Quand tout est calme à l'environ.
J'aime à marchir dans les vallées,
Dans les gardins, dans les côtis,
Ouestque les boués font des allées,
Et l'herbe doune un vert tapis,
Ouestque nou ouait la douoche allouette
Et le mergot nou veit souorir,
Ouestque nou-s-entend la cauvette
Et l'potiron nou veit flieurir.
Que la nature est grande et belle,
Que de biautés à l'entou d'nous!
L'pauvre et le riche ont leux parcelle
De chein que l'bouon Gieu fait pour tous.
Si tout est si bé dans la vie
Et au d'sus d'nous et souos nos pids,
Si notre terre est si flieurie,
Que sera donc le Paradis?
|
