Quand 'ou pensez à la Campangne en hivé, viy'ous un portrait qu'est tout blianc, tranchille auve né tchi'tchait douochement? Ou'viy'ous p't'être à la pliaiche, eune campangne pus ou mains sombre et grise, tchi s'prépathe pour s'èrposer? Quand plyie et vent, grile et tchiquefais né fondue aidg'tha à tchique p'tit russé à prendre san c'mîn un mio pus vite avâu p'tite banque faut dithe, ou travèrs eune d'géthande et l'long d'un pré en chèrche d'la grève et finnâlement la mé.
Chutte me la nouot'tre anmie. Rude p't'être à chutte saison 'chin d'hivé, mais n'faut pon oublier qué ch'est lyi tchi garde nouot'tre p'tit Jèrri ou'est qu'j'd'meuthons mains fraid, auve un temps pus doux châque hivé. Bein chanceux qué les grîns d'un vrai hivé nouos manque souvent et des mots comme glace et gliaichon, le grénot et l'onglyie, reste muchient dans I'driéthe dé l'esprit et n'pas déhaler trop fais en convèrsâtion.
Assez pour nous d'vaie les bouais touos nuent, branges sans fieil'yes, ieux pouôrre fîeil'yes toutes mortes, lus travas finni. Par tèrre a'ch't'heuthe l'long p'tite ruelle, c'mîn, et auprès d'vivyi, à maîntchi pouôthient toutes ieux, prêttent pour l'ouaîthlin - grive, mêil'ye, rouoge gorge et p'tit raît'lîn à gratter parmi l'frais bann'lais, à toute forche même d'vant qué'l'solé est l'vé, en chèrche dé fraîche nouôthituthe tchi s'trouve là d'nouver chaque matin.
En pliein clios si'n'y'a pon gelé, la touônn'nie c'menche, ou'est qué grosse pie et vièr corbîn épinnocquent lé tèrrain l'tout d'ieux. Mauves suivent la tché'thue en èrgardent pour aut'cheune chose qué chutte tché'thue là, lève, vèr ou mulot pour avaler. Etournieaux r'arrivent d'l'aut'but du clios, en' fliotchet, touos à lus s'entrent pâler, tchi catchet! Mais l'ciel reste gris, l'temps touonne laid, quand Nièrmont met san bonnet la plyie veint d'vant la niet, Mathais et tèrrain ésa tromper d'nouver.
Pip'sole, p'tite bouonfemme et g'zettes sauvages vèrdisses, mais quand même acouo'the toutes fleü'yes, comme la violette dans l'gardin. Lus flieurs n'pas même en bouton, mais restée bein muchient jusqu'a l'hivé est pâssé, boutons bein à l'abri souos la vèrduthe des fieil'yes.
Crapaud, hèrison, freunmion et bourdon en paix, tout ch'la dort travèrs chutte saison'chin d'hivé, tandique bestias chèrche l'abri étout, d'fossè, banque ou côti, hors dé plyie, grile et vent d'un mauvais hivé.
Mais p't'être qu'aniet i'f tha sé et bé et vaques et géniches reunmin'thent en paix, contentement au p'tit solé. Un solé pus bas dans l'ciel qu'en' êté - sa p'tite chaleur molli par un, p'tit vent d'amont, tchi pique valet pouor nouos ramémouaither qu'après tout, ch'est l'mais d'janvyi, et dé réjouithe dé la campangne en hivé.
Edward Syvret
Viyiz étout: