Batâle dé Flieurs 2007
La beinv'nue du Président
Séyiz les beinv'nus à la Batâle 2007! N'en v'là-t-i' not' chînquante-siêxième année d'siette d'pis l'èrlanch'chie en 1951. Mes toutes preunmié mémouaithes d'la Batâle m'èrveinnent d'1954 quand j'aîdgais la bâtithie d'un char et nou-s'entouortilyait les flieurs l'travèrs d'fi d'fé. Au jour d'aniet, nou fait sèrvi du bouais, des barres d'acyi et d'la polystyrène à seule fîn d'stchulpter les formes et designs qu'ou viyiz aniet. Ch'est en tchi achteu nou cliute toutes les flieurs et les babinnes-dé-lièvre à seule fîn d'graie ches mangnifiques chars.
Les cheins d'entre vous tchi sont assis dans les stands du par à pathade éthont étout la chance dé vaie les dgaîngues et sonneurs v'nus d'hors Jèrri pouor la pathade dé l'arlévée.
Les cheins tchi n'ont pon veu acouo la Pathade au cliai d'la Leune es'sont les beinv'nus d'main au sé. Quand les chars sont êcliaithis, nou dithait qu'il ont du feu! Épis ous allez têmouongni l'êpreuve dé battre l'èrcord du monde pouor la lanch'chie d'fîsées. Ch't' êpreuve s'en va faithe sèrvi 140,000 fîsées. Lé couronnement d'la séthée s'sa eune grande lanch'chie d'feurs d'artifice.
J'vos souhaite eune bouonne bordée d'Batâle. J'voudrais r'mèrcier les chentaines dé volontaithes tch'ont travailli d'pis bein des mais à seule fîn d'graie l'êvénement. J'voudrais r'mèrcier l's exhibiteurs - y'en a entre ieux tch'ont ieu eune niétchie d'travas sans pouver accliâsser. J'voudrais r'mèrcier étout les Membres et l'Pèrsonnel du Conmité d'la Batâle dé Flieurs dé Jèrri pouor lus souôtchien innestînmabl'ye.
Mèrcie bein des fais à touos et à toutes.
Viyiz étout: