Les Pages Jèrriaises

La Statue d'la Reine Victoria

La Statue d'la Reine Victoria

La Statue!

À l'Éditeu de la "Nouvelle Chronique"

Moussieu, - Savous bein c'h'qui m'est montai au chervé à l'ocâsion de la grande fête de l'Estatue de la Reine? Eh bein, chez chunne chin: Que toues les Chantenièrs, Oficièrs de Connêtablles et Vingtenièrs et à toues en poste, de mettre le jour de la procêsion de nèzes câsaques, nèzes brais, nièrs gants, bians neck tie et un bill topper. Crious-pon que chunna paraîtrait-ben? Quant à mé je l'întention de c'mandé un neu suit pour le jour; nou ma dit que si j'veux avé un bouan fit il faut allé siès l'couasin G..., dans la Rue de Drizièze, car paraît-i, chest là le galliard pour feze un bouan fit. J'ai fait bein sus mes patates ch't'ennaie et j'enne dait rain à personne. J'ai payi man guano (ou pouvais le d'mandé à Capt. P...., car j'le prends tréjous de li); rein ne m'empêche acheteuthe d'avé un neu suit d'habits, et je m'envais l'avé pour faithe honneu à Sa Majesté.

Votre anmin,

Jan d'la Ville-au-Veslet

 

Nouvelle Chronique de Jersey 30/8/1890

 

Lé Dêcouvrement de la Statûe d'la Raînne Victoria, en Jêrri

 

-" Goude mârlingue, mistré Police Officeur'," j'lî fît en le r'gardant, " aoúre ioû ? faîne oueddeur tou-daîe, aîe?',

I' se r'dêtouânnit bein sqouotrément. Quand i' vit tch' est qui lî pâlait si polîment, i' s'mînt à souôrize, et tout d'un coup i' m'dît : "Ize ette ioû, Caiptunne ? Come ine, dê-ve bîne aissekinne fore ioû ainne yeûr micice toû-r'trie taïme -come ine." Et j'entrîmmes.

Oprès qu' j'eûmmes 'tè faize le tou' d'la Statûe, et que j'l'eûmmes bein examinèe et admizèe ; car, oui, ma foué ! ch'est unne belle piéche. -" Ch'est pitchi, " se m'fît Janneton, " qu'la pouôre Raînne s'sait si néze - est-che qui n'pouvaient pon la faize biânche, pûtôt ? I' n'y-a pon d'soin; oulle est bein r'sembllante; mais oulle est un p'tit p'tite, jîndèe si haoût - ch'est chein qu'j'y trouve.

Tout d'maîmme ch'est llî par les portraits qu'n'ou z-en veit partout.

-Et pîs ch'est chutte belle pièrre ! si bein taîllie et travaîllie - ch'est supèrbe tout ensemblle."

 

Lé Dêcouvrement de la Statûe d'la Raînne Victoria, en Jêrri

 

Lé Dêcouvrement de la Statûe d'la Raînne Victoria, en Jêrri

 

Et j'pense bein qu'l'estatue d'la Reine Victoria est acouo sus la cauchie à faithe sèrvi d'pliaiche d'arrêt et d'convénience pour mauves et pigeons, car La Batâle dé Flieurs pathaîssait pus împortante pour l'ûsage dé la main d'oeuvre disponibl'ye ès autorités qué les travaux nécessaithes pour la mett' dans san nouvel empliaîchement!

George d'la Forge lettre 22/8/1975

 

La Statue d'la Reine Victoria

 

En pâlant d'monuments, en allant en ville d'la Reine Victoria est acouo sus la caûchie où'est qu'oulle est assujettie au manque dé respé d'un tas d'pigeons. J'pensais pourtant qu'ou s'en allait êt' transportée à un domicile pèrpétuel dans l'par à côté dé s'n avenue. J'espéthe dé lî vaie d'vant m'en r'aller en Améthique, viyant qué v'la tchi m'fait chose dé la vaie où'est qu'oulle est à ch't heu. J'n'ai janmais oublié qué ch'tait duthant san règne qué j'vis l'jour.

George d'la Forge lettre 19/6/1975

 

Le Dêcouvrément d'la Statûe
 

Dans ieune dé mes dreines lettres j'avais m'nichi d'êcrithe à Moussieu l'Député Stanley Le Ruez si l'estatue d'nouot' bouanne vielle Reine Victoria 'tait laîssie à l'înjuthe des mauves et pigeons sus la caûchie. Eh bein, à ma grand' jouaie, j'vai dans la gâzette du chînq dé févri qu' ou s'en va finalement êt' transportée à sa nouvelle démeuthe dans l'par à côté dé s'n av'nue. Comme Moussieu R. A. Hunt, l'Arpenteux d'la Ville, 'tait d'avis qué l'transport sé f'thait dans tchînze jours ch'est seux qu' j'éthai l'pliaîsi d'la vaie en pliaiche quand j'veindrai en Jèrri vèrs la fîn d'mai.

 

George d'la Forge: Lettre 27/3/1976

 

La Statue d'la Reine Victoria

 

Par exempl'ye, y'a longtemps qué j'disais dans mes lettres qué ch'tait honteux d'laîssi l'estatue d'la Reine Victoria sus la caûchie où'est qu' oulle 'tait assujettie à l'înjuthe des ouaîsieaux tch'en faîsaient un lieu d'aîsance. Eh bein, j'veins d'aver l'pliaîsi d'vaie san portrait dans la gâzette du onze dé mar en c'mîn pour sa nouvelle démeuthe. Et dans la cheinne du 25 dé mar, qué j'veins d'èrchéver, ou règne sus san nouvieau trône dans l'par tchi s'en va êt' honoré par san fanmeux nom, à côté d'la grand' route dêjà nommée Victoria dépis longtemps. Il a prîns longtemps ès autorités à lus en d'menter, et j'sis d'avis qué l'Député Stanley Le Ruez a aîdgi à en faithe cas par aver entanmé la tchestchion d'sa nouvelle démeuthe dans l's Êtats.

 

George d'la Forge: Lettre 8/5/1976

 

La Statue d'la Reine Victoria

 

Jé n'peux pon sénon aver r'gret d'vaie l'estatue d'la bouanne vielle Reine Victoria entouothée d'motos et salie par les pigeons ou mauves sus la cauchie où'est qu'oulle est à ch't heu. Heutheusement, ou règne auve dîngnité sus les motos comme ou l'fît sus l'gardîn et les flieurs pour eune huiptantaine d'années (sa cérémonie d'ouvèrtuthe ayant eut lieu l'trais d'septembre, 1890) dévant aver à s'soumett' à l'exigeance du transport dé la vie modèrne dépis qu'les d'scendants d'ses sujets ont pèrdu l'habitude dé marchi et d'aller à j'va. Nou peut dithe qu'oulle a maintînt sén air sérein tout l'temps d'san dêpliaichement et d'pis, mais ch'est seux qu'ou n'en pense pon mains. Où'est qu'oulle îtha quand l's autorités prendront l'temps d's'en d'menter? Deux-s'trais pliaiches ont 'té suggéthées par vouos lecteurs. Quant à mé, j'espéthe qu'ou sé r'trouvetha en pliaiche parmi des flieurs et au natuthé. D'en par ichîn, i' m'sembl'ye qué la miyeuthe suggestion est d'la mettre dans l'par Howard Davis, et acouo mus dans l'par tch'était la Haute Mielle dans l'temps jadis, appelé lé "People's Park" à ch't heu, ou à la tête dé l'Avenue Victoria à côté.

George d'la Forge: Choses et autres

 

 

Viyiz étout:  

Les Pages Jèrriaises