"Mais tchi dgiablye qu'i' t'est arrivé?" s'fit l'Ph'lip Declios quand i'm'vit l'aut'arlevée adôssé countre él fossé sus la route du Tas d'Geon, "es-tu malade?"
"Pas pus qu'cheunna," j'lis dis, "j'sis à faithe eune p'tite touônnée mais mé v'la lassé: i' faut qué j'm'arrête tchiques minutes m'érposer."
Le Ph'lip s'sassit au pid d'mé. "Eh bein," i' s'fit, "tout en t'érposant raconte mé l'histouaithe d'la statue à la Reine Victoria à Bangkok dé tchi qu'tu m'pâlais l'aut' jour."
"Vai-tu," j'lis dis, "quand j'bâtîmes l'Ambassade à Bangkok j'êrigîmes, à chent pids d'la grande entrée, eune statue à la Reine, car dans son temps n'y'avait persoune au mounde pus puissante qu'lyi et ou' régnait sus la maintchi dé chutte terre. Mais ché n'tait pas seulement pour cheunna qu'ou' 'tait si r'noummée, ch't'ait étout parcqu'oul' avait tant d'êfants, et ou'tait r'gardée coume l'emblyème dé la fèrtilité."
"Les Thailandais aiment les grandes familles, et eune femme mariée a hounte s'ou' n'a pas d'êfants. Et d'même i'd'veint couôteume qué les jeunes filles, devant dé s'marier, v'naient à l'Ambassade touchi la statue et y faithe eune révérence, seuses que d'même il' ethaient eune dgaîngue dé mousses."
"Quand les Japounnais nos fîtent la dgèrre il' otchupîtent la Thailande, et nous et nos alliés j'fûmes forchis d'tchitter nos ambassades. S'loun la louai internationalle i'n'est pas permînt, même en temps d'dgèrre, d'otchuper ou d'touchi les ambassades dé s'n'enn'mîn, et au c'menchement les Japounnais né touchîtent pas la nôtre."
"Mais i's'apérchutent bein vite qué, djà qu'officiéllement les Thailandais et nous j'taîmes enn'mîns (car les Japounnais les avaient forchis dé s'allier avec ieux countre nous,) les jeunes Thailandaises continuaient à v'ner touchi la statue. V'là tchi n'pliaisit pas du tout ès Japounnais, et i' pensîtent même d'abattre la statue, mais i' s'avisîtent qué v'là tchi f'rait mârri les Thailandais, et d'même à la pliaiche dé l'abattre i' bâtitent eun côffre en bouais alentou pour qué les Thailandaises né pussent pus ni vaie ni touchi la Reine. Ah mais, les Thailandaises n'allaient pas aver d'ité! I'v'naient dé partout l'pays pour la touchi et quand i'la trouvîtent enfreumée dans eun côffre la haine countre les Japounais d'vînt si forte qu'il' eûtent à dêmoli l'côffre et laissi les filles érverner touchi la statue."
"Quand la dgèrre fut finie et que j'érveîmenes à l'Ambassade j'countinuîmes bein seux chutte bouonne vieille couôteunme, et toutes les jeunes filles qui voulaient entrer pour touchi la statue 'taient beinv'nues. Et ch'tait d'même quand j'd'vîns Ambassadeur en l'année séptante. Mais tchiques mais pus tard, quand tant d'ambassades britanniques 'taient l'objet d'terroristes dé toutes les sortes i' m'envyitent dé Loundres eun jeune expert sus la securité vaie si la nôt' 'tait coumme i'faut. Le pouorre gas faillit s'êvanni quand i' vit tant d'Thailandaises entrer sus l'terrain d'l'ambassade sans autcheun countrôle. 'Mais,' i's'fit, 'ch'est eune opportunité pour autcheun terroriste d'envahi l'ambassade!' et i' voulait à toute forche qué j'mîns fîn à d'ité."
"Mais, vai-tu, mon Ph'lip, i'n'avait pas grand-chance dé m'faithe changi, car dabord j'tais l'Ambassadeur et eun ambassadeur n'est pas à même d'êcouter autcheun pèrrot, même si i'veint d'Loundres, li dithe tchi faithe, et pis étout dans mon temps j'avais mé-même 'té Chef dé Sécurité au Foreign Office, et sus chu sujet-là j'en savais pus loung qué chu jeune gamin s'n'allait jamais apprendre. Et d'même j'lis dis dé s'en r'aller à Loundres et dé m'laissi coundithe mén ambassade coumme i'm'pliaisait."
"Et d'même, seulement par laissi les jeunes Thailandaises v'ner touchi la statue d'la reine j'asseuthi qu'les rapports diplomatiques entre la Thailande et la Grande Brétagne restîtent des millieurs. Mais, dans touas les rapports entre les pays i's'arrive dé temps en temps qué nou'n's'accorde pas. I' s'adounnit qué dans mon temps lé Ministre des Affaithes Etrangières d'la Thailande 'tait eun vièr amîn qué j'avais counnu bein d's'années, et quand tchiqu'chose s'arrivait entre nous ouèsqué jé n'taîmes pas tout-à-fait du même avis j'soulais lis dithe: 'Ergas, si jé n'pouvouns pas nos accorder ichein d'sus, j'm'en vais freumer les hèches dé l'ambassade countre les jeunes Thailandaises et l's'empêchi d'touchi la Reine. Pense à qu'v'là tchi f'ra à la populatioun d'la Thailande.'
'Hélas!' i's'faisait en riant, 'i' nos est bein dit qu'i' faut sé l'ver dé bein bouonne heuthe s'nou' veur aver l'avantage sus les britanniques.'"
Lé Vier Trin'tais
JEP 27/6/1991
Viyiz étout: