Les Pages Jèrriaises

L'Assembliée d'Jèrriais

L'Assembliée d'Jèrriais

Au Vièr Châté
L'Assembliée d'Jèrriais


Pour la rêunion mensuelle, l'Assembliée s'rêunit en pliain air dans l'bel du Vièr Châté à Gouorré Vendrédi au sé, lé 25 dé Juillet 1952, à 8 heuthes, - la mâjorité des membres étant v'nus d'St. Helyi en char-à-bancs fournis par lé Sieur U. V. Noel, des "Waverley Tours," à St. Martin.

L'y-avait souoxante et tchiques membres présents, et l'Cap'taine Josué Dorey avait arrangi des bancs sus la p'louse au pid des hautes muthâlles du châté, mais la séthée 'tait si belle qu'un tas d'gens lus assiévîtent sus l'hèrbe à êcouter la lectuthe du rapport dé l'Assembliée du mais d'juîn.

L'Histouaithe du Châté en Jerriais
Quand l'Cap'taine Dorey învitit les gens à s'appréchi d'li pour ouï l'histouaithe du châté, i' l'trouvîtent si întérêssant tch'il avait à peine dit dgiez patholles tch'il' 'taient tous alentou d'li comme des moûques-à-myi l'tou d'eune rueûque!!

Moussieu Dorey fut un magnifique dguide et historien. A chaque pas, à chaque dégré, dans l's'appartainements et les chambres dépis l'haut jusqu'au bas, i' nouos racontit l'histouaithe d'eune maniéthe si vivante qué nou pouvait quâsi envisagi les vièrs miliciens Jèrriais à faithe la garde sus les remparts dans l'temps jadis, et les soudards Angliais atout lus arbalêques driéthe les meurtriéthes qué nou vait dans les hautes muthâlles alentou d'sé, - les mêssieux d'la garnison à jouer au jeu d'paume sus la p'louse en d'vant d'la chapelle, tchi 'tait, étout, la Boul'lie du Châté, - et i' nouos sembliait quâsi ouï les soupis des prîsonn'yièrs tch'étaient tchiquefais d's'années dans les cachots et les p'tites chambres viyant tch'il avaient ôsé dêpliaithe à tchique grosse tête dé chu temps-là.

Lé Cap'taine, étout, a eune fanmeuse maniéthe dé vouos raconter tchiquechose dé tragique si solennellement qu'nou pouorrait quâsi en plieuther, et pis i' finnit tréjous auve eune pétite expression amusante ou tchiques pétits mots rîsibl'yes tchi vouos font roubliyer la trajédie et appréciaier l'pliaisi du moment actuel!

Eune magnifique veue


Sus l'haut du donjon, les membres fûtent êmèrveillis du charme et d'la bieauté d'la veue qu'nou vait d'là-haut! Lé ciel avait acouo la lueu rouogeâtre du couochi du soleit, et nou viyait l'craîsant justément en d'ssus d'la tèrre à l'Ouest. La mé 'tait calme comme eune mathe et d'un bliu supèrbe, - un contraste mèrveilleux à la rouogeu dans l'ciel! L'ensembl'ye faithait un portrait d'eune bieauté tch'éthait 'té l'rêve d'un peintre, et ch'est seux tch'i' n'y-a rein d'pus bé souos l'touannement du soleit!

En tchittant l'bieau vièr châté, l'Assembliée s'reunit au café Capri pour des rafraichissement et l'Président Hedley le Riche Edwards, au nom d'touos les membres, èrmèrcyit Cap'taine Dorey et sa charmante dame pour les aver si bein r'chus, et l'captaine pour la maniéthe si întérêssante tch'i' nouos avait montré l'châté et raconté s'n'histouaithe. Le Président èrmèrtchit, étout, qué l'Assembliée 'tait hardi r'connaissante au Sénateu John Le Marquand pour nouos aver donné pèrmission d'visiter l'châté au sé.

Nouvieaux membres

Les nouvieaux membres êlus chu mais sont:- Mmes. Marjorie Maillard, Olive Vibert et Lilian Dorey, Mlle. Dora J. Hacquoil, et Mêssieux Philip Francis Coutanche et Clive Hacquoil.


 

Viyiz étout:

 

 

Les Pages Jèrriaises