Le Ménage ès Feuvres,
St. Ouën.
Moussieu l'Rédacteu,
Appathement, i' n'manque pon d'aspithants ès honneurs du sérvice honorifique dé l'Île. J'vai qué Moussieu Raymond Le Cornu, l'populaithe Connêtabl'ye d'Ste. Mathie, n'a pon d'opposition pour Juge. Un charmant corps, Moussieu L'Cornu est un homme dé belle présence tchi f'tha honneu à la chèrge dé Juré-Justicier.
J'vai tch'i' y'en à plusieurs tchi veulent être Sénateu pour rempliaichi l'défunt Sénateu J. J. L'Mèrquand. Ché s'sa l's êlecteurs dé l'Île tchi s'sont enchèrgi d'en êlithe iun. Tchi privilège - et en mème temps tchi responsabilité! I' s'en va êt' întéréssant d'vaie létché des candidats tch'en gangn'na. Nou comprend bein qu' des Députés, déjà êcolés dans l'art législatif, aspithent à la pus haute dîngnité d'Sénateu, souvent auve bouanne raison. Et s'il' ont 'tê d's années dans L's Êtats ch'est un manniéthe dé couronnement pour ieux. Mais, en pratique, lé Sénateu - comme lé Député - n'a qu'eune vouaix à donner, pour ou contre, et i' n'a pon pus d'chance qu'un Député d'êt' président d'un conmité. Enfîn, comme jé l'disais pus haut, ché s'sa întéréssant d'vaie l'rêsultat d'l'êlection si y'en a ieune.
Eune chose tchi m'êtonne est d'vaie, par les lettres êcrites à la gâzette par un membre du “Mouvement Démocratique dé Jèrri”, qué l'Île est eune terribl'ye pliaiche à d'meuther d'dans, qu' oulle est mal gouvérnée et qu' nou dév'thait changi tout et payi les Membres d's Êtats. À m'n idée, ché s'sait encouothagi un tas d'pièrchèurs à y siègi. J'mé d'mande s'il a rèalisé qué l'Île d'veindrait banqueroute dans p'tits d'temps s'i' fallait qué l'Trésôryi d's Êtats payîsse les Membres autant comme i' pouorraient gangni à travailli sus la caûchie? Et mé tchi criyait, ayant vétchu eune longue vie en grand' partie dans d'aut' pays et veu comme tchi tch'i' sont gouvèrnés, qué Jèrri 'tait l'mus gouvèrné d'tous! Chein qué jé n'comprends pon est pourtchi qu' un malcontent, tch'est v'nu s'èrnarder en Jèrri, y reste quand i' trouvé qué ch'est eune Île si mal gouvèrnée?
Iun d'ches jours i' faudra allouangni La Rue ès Trais Pigeons si l'nombre d'Êcrivains et Avocats continue à grandi. Lé drein tch'a rêussi l'examen pour Êcrivain est l'janne Moussieu L'Boutilyi, et j'lî souhaite bouanne chance. Nou m'a dit tch'il est au-fait et bein charmant. Eh bein, j'n'ai pon d'peine à l'craithe. San p'pèe y'est étout. Et san papa et grand-papa, lé Juge James John Le Boutilyi, y'étaient étout. Ch'est dans la fanmil'ye, comme nou dit en Jèrri! Quand j'tais janne à La Mouaie à St. Brélade, j'allais à Beauvoir, lus maison d'fanmil'ye, quâsi touos les jours, et i' n'y avait pon mouoyen d'trouver d'miyeu monde et vaîsîns. Quandi qu' j'éthons la chance d'aver du monde dé lus calibre comme Êcrivains, lé vièr Pid-froutchi étha d'la peine à garder sa réputâtion qué “D'Êcrivains et Avocats, l'Dgiâbl'ye fait un grand amas!” comme lé vièr diton Jèrriais nouos l'dit.
Dans ieune dé mes dreines lettres j'disais tch'i' fallait mett' lé chabot souos les reues dêpensiéthes des Êtats. Eh bein, les plusieurs conmités n'pathaîssent pon aver prîns à tchoeu l'dgèrnissement du Sénateu Cyril Le Merquand tch'i' faut couoyer viyant qu'les sou du publyi n'sont pon faits ronds pour rouôler, car i' continnuent à d'mander des sou. Lé Conmité d'l'Asseûthance “Sécurité Sociale” veurt siex chents mille louis pour sé donner d'belles offices dans La Rue de la Motte. I' sont à lus pliaindre tch'i' n'ont pon d'run où'est tch'i' sont. Mais comme i' sont à l'abri et tch'il' ont des tchaises et des scabelles à lus assiéthe dessus à faithe lus travas, et qu' ch'est probabl'ye tch'il' ont assez d'run pour faithe eune tâssée d'thée matîn et arlévée pour soulagi un travas aussi dû à enduther comme lé leu, nou créthait qué lus conscienche né pèrmettrait pon eune dêpense dé mème pour l'amour d'aver un p'tit pus d'run, principalement quand l'contrôleux général dé nouos finnances nous dgèrnit tch'i' faut arrêter les grosses dêpenses pour lé moment.
Ch'n'est pon ravissant qu' les campangnards tchi sont en travas dans les clios à l'înjuthe dé touos temps et auve un manque dé main d'oeuvre à lus aîdgi, craient qué nouot' gouvèrnément pouorraient lus graie atout la maîntchi du nombre d'clèrcots tch'i' vaient à clèrcoter driéthe les compteux quand il ont l'malheur d'aver à aller en ville et les visiter pour affaithes officielles!
George d'La Forge
Viyiz étout: