Nennin, bouannes gens! Mais ch'est des femmes, des femmes qui sont up-to-date,
Qui sont nommées par un si drôle de mot;
Enfin, y sont de ch't espèce-là, que Lock, le grand poète
Appelle "des poules sans pliumes qui chantent en co,"

Y sont en Angliéterre acheteu, mais y s'en veinnent en Jêrri,
J'ai veu lus noms sus plusieurs des papièrrs.
Y'a une Miss Billington, Miss Gawthorpe, et une Miss Kenny,
Toutes des hardelles qui n'ont pas d'fred ès yierrs.

T'chest que ch'est qui veulent? Pour bain en dithe, y n'démandent pas grand'chose,
Tout simpiément que chaque femme ait une vouaix!
Y r'cliament lus Women's Rights, et voudraient savé la cause
Qui n'y ait qué l's hommes qui piaissent porter les braies!

Ou verrez tchest qui s'arrivetha quand y veindront ichin,
Avec lus flags et tout lus tintamarre,
Nos femmes sont seuthes d'aller les joindre, je n'pouorrons pus les t'nin,
Illes enrôlethont des r'crues à toutes les carres.

Y s'attroupetha des chents personnes sus les dalles du Vier Marchi
Pour les ouir criâder lus politique,
Et malgré l's ordres de "Trouve à r'dire" illes îthont lus pertchi
Jusque sus l'haut des steps d'la "Vieille Chronique."

Se trouvant bain d'la position, illes adress'ont la foule;
"Sisters and comrades! If you would all be free,
Be up and fight for Women's Rights! Let not your ardour cool
Until you've won a well-earned victory!!"

Imaginous si par hasard y gagnent le but d'lus cause!
Tchi révolution v'la qui f'thait dans l'île!
J'vos garantis que d'vant longtemps nou verrait d'drôles de choses
Se passer en campagne et dans la vîlle.

Tchi caquetethie dans l's assembliées, et les jours d'êlection!
Les viyoux à s'entre airaichi les qu'veux?
Combain d'affaithes de présentées dévant l'Juge d'Instruction,
Qui lus ditha qu'fallait lus t'nin siez yeux.

Y n'lus content'tont pas d'voter, y lus faudra des postes.
Tchiqu'unes lus présent'tont comme candidats;,
Freddy Helleur s'ra opposai par la vieille Marie Joste,
Chein qui caus'sa un vrai galimatchas!

Et pis à St. Brélade, quand y faudrait un député,
Nou vot'rait tous pour Jack Le Boutillyi,
Mais je n'srais pas bain êtonnai d'vais Charlotte se r'butter,
Et v'nin en avant pour prendre contre li!

Si, par chance, à St. Aubin, yeux qui sont pour le progrès,
Et qu'attendent une belle enlouoge dépis longtemps,
S'ils allaient dithe à Cap'tainne Joe "Allez cherchi des vouaix,
Car j'avons mins Souky Dean sus les rangs"!!

You qui y'éthait dea Suffragettes che s'sait dans l'fond d'Grouville,
Y capsizeraient Herbert Bertram, bain seux,
Et pis notre anmin Jack Labey, qu'est pourtant bain habile,
Perdrait bain vite, sa pliaiche comme enregistreux.

Good-bye, la Rose! adieu, l'Louothi! Ah! pauvres St.Ouennais!
Quand toutes vos femmes éthont tai minses au Rât,
Ou s'rez forchis d'gardé vos viaux, et d'les vendre ès Danouais.
Jamais ne r'mettrez "la couronne au tas."

Dans l'Vau d'la Mathe, dans l'fond d'l'Etacq, même dans la Ville au Neveu,
Les femmes touan'nont vos pus grands partisans;
Si Frainque vote pas pour Missis Chose, faudra qui couoche tout seu,
Car Mary Jane s'en rîtha siez ses gens.

Et pis en Ville, you qui y'a douze mille femmes, ergardez bain à vous!
Car si peuvent vénin en autoritai,
Y dépliant'tont E. B. Renouf et y nettront "Ginger Loo,"
Par deux chents chinquante vouaix d'majoritai.

Touos les pouores baloques d'hommes mathiès, n'éthont pus rain à dithe,
Chest yeux qui restéthont à la maison,
A r'grais les cauches ès mousses et à mettre la soupe à tchuithe!
Je sommes des imbéciles si je l'faisons.

"MONTE CRISTO."
1906