Moussieu l'Rédacteu,
Quand j'sis au Ménage auve ma bibliothèque d'amain, j'ai tréjous l'nez dans les livres, comme mé disaient Papa et Manman quand j'allais à l'êcole, et j'y'trouve un tas d'choses intérêssantes au sujet du temps passé.
Sus man portrait du Vièr Marchi en 1738, quand L'Général Jean Cavalier fut assèrmenté Lieut'nant Gouvèrneux lé dgiex-huit d'août dé ch't année-là, j'vai qu'la date sus l'haut d'la porte d'La Cohue est 1520. Il est si intérêssant, chu portrait-là, que jé n'mé lâsse janmais d'l'èrgarder. Nou-s-y vait même des moutons à quat' cornes ! Y'a longtemps tch'il' ont dispathu, mais Papa m'disait quand j'tais mousse tch'i y'en avait un tas par les c'mîns dans les touos vièrs temps.
Mais, pour èrvénîn à La Cohue. Dans san journal, lé fanmeux Jean J'valyi, historien Jèrriais, nouos dit qu'oulle 'tait un failli bâtisse dé caux et d'sablion, et tch'i' n'savait pon quantchi qu'oulle avait 'té bâties. Dans s'n histouaithe dé la Ville dé St.Hélyi, L'Avocat Edmund Toulmin Nicolle, dé mémouaithe respectée, nouos dit qu'oulle 'tait en si mauvais êtat qué Messire George de Carteret fit d'sorte, en 1647, qu'ou fûsse abattue - pour en r'bâti eune neuve sus l'même empliaichement. Moussieu Nicolle nouos dit qué dans chu temps-là l's habitants avaient à travaili pour rein, et i' n'y avait qué l's hommes dé vocâtion tch'étaient payis. Lé Vicomte avait à les payi, et deux Juges ou Connêtabl'yes 'taient enchèrgis d'prendre lus tou à «garder l'yi sus les machons!»
La pièrre pour la neuve Cohue vint du Mont Mado et l'bouais d'La Nouormandie et les dalles dé Swanage en Angliétèrre. I' faut penser tch'i' travaillaient vite dans chu temps-là car la neuve Cohue fut ouvèrte lé 27 d'avri, 1648. Sans doute, ou couôtit des sou, et quand les cheins présentés d'vant Justice 'taient mins à l'amende, l's amendes 'taient minses dé côté pour aidgi à payi les frais d'construction, et l'produit d'la vente des propriétés des cheins tch'avaient prins part contre les Rouoyalistes dans la dgèrre civile en Angliétèrre, et tch'avaient 'té confistchies en conséquenche, fournit la balanche.
Chutte Cohue-là duthit jusqu'en 1760 ou 1768. L'histouaithe dé La Ville dé St.Hélyi par L'Avocat Nicolle donne l'année comme 1760, et « La chronologie de Jersey » par Ralph Mollet dit 1768. Oulle avait deux êtages et un cliochi. La clioche annonçait les séances dé la Cour à l'avanche, et i'pathait qu'auprès qu'ou d'vint cratchie ou disait « Chicangne » quand oulle 'tait sonnée, pour ramémouaither ès gens qué ch'tait des chicangnes tchi l's am'naient dans la Cour !
La belle grand' Cour Rouoyale qu'ou viyiz à ch't'heu fut bâtie en 1864. Nou n'dithait pon à la vaie qu'oulle a pus d'chent ans ! J'pensais à tout chenna l'aut' jour quand j'tais à la r'garder dans L'Vièr Marchi, et j'avais envie d'pouver m'èrtchuler dans les touos vièrs jours et vaie La Crouaix du Marchi tch'était d'but où'est qu' l'estatue du rouai George II est, à ch't heu (ch't estatue-là fut minse en pliaiche en 1751), et la cage dans tchi tch'i' m'ttaient les malfaiteurs en attendant d'êt' présentés dans La Cohue même. Oulle 'tait entre La Crouaix du Marchi et les maisons ou'est qu'la Chambre d'Conmèrce est à ch't heu. Ch'tait l'vîngt-deux d'mar, 1697-8, qu'ou fut abolie par Acte d's États viyant qu'eune prison avait 'té bâtie où'est qu'est « Charing Cross» dé nouos jours.
Y'en a-t-i' ieu, des changements, d'pis chez temps-là! S'i' pouvais pâler, ches vielles Cohues-là, en éthaient-i' à nouos raconter, man bouanhomme! Ch'tait en 1668 qué L'Marchi fut pavé. Dévant, ch'là ch'est seux qu'les gens tch'y v'naient au sanm'di dans l'hiver avaient à pilvâtchi dans l'pité, et i' d'vaient en douoilli l'aithe dé La Cohue quand fallait y'entrer. Les gens 'taient sévéthement punnis pour bein p'tit d'choses. Y'avait l'cas du nommé Andrieu Lescaudey. Dans san livre « Jersey , ses Antiquités, etc. » M. La Croix nouos dit qu'en 1533, l'jeudi « après l'Annonciation de Notre Dame », l'pouorre Lescaudey fut condamné à aver ses ouothelles copées - et ses j'veux étout, pour que l'monde pûssent vaie tch'i' n'avait pon d'ouothelles - et ch'tait à cause dé « larcin et malgouvernement » mais i' n'est pon dit tchi sorte d'gouvèrnément tch'il avait à gouvèrner!
Des femmes atchusées d'paillardise 'taient condamnées à êt' fouettées publyiquement, jusqu'au sang, en marchant d'la porte de La Cohue jusqu'au chînm'tchièthe. Et pis y' avait l'pilôsi. En octobre 1619 la pouorre Catherine Le Sauteur fut minse dédans viyant qu'oulle avait mins des braies et s'était dêdgisée en homme. Et les braies fûdrent exposées à côté d'lyi dans l'pilôsi ! S'i' fallait punni les femmes pour mett' des braies au jour d'aniet, L'Vièr Marchi né s'sait pon grand assez pour l's assemblier, sans pâler du pilôsi!
Jersey Evening Post 10/6/1970
Viyiz étout: