Ch'est un grand pliaîsi pouor mé d'vos faithe la beinv'nue au Show du Vouêt 2004 présenté par la Gâzette du Sé. Ch'ti-chîn est l'quatrième show r'grée par l'Associâtion du Show du Vouêt.
Tout coumme les shows dé d'vant, chu show s'en va mouontrer tout ch'qu'i' y'a d'bouôn – la vaque dé Jèrri, la vie d'la campangne et les couôteunmes dé Jèrri. L'Associâtion a travailli bein dû pouor plianner les tentes, les compétitions et les mouontréthies des deux journées tchi veinnent. Bouonnes gens, ou n's'sez pon d'sappointés!
Viyant qu'i' y'a tout pliein dé changements dans l'agritchultuthe, l'hortitchultuthe et la lait'tie et lus traditions, les cheins en chèrge du show ont décidé d'vos mouontrer les calenges et l's opporteunités d'ches changements. Par exempl'ye j'espéthe qu'ous avez 'té un fièr fliotchet à r'garder l'exposition d'bêtes à matîn – véthe, ch'est la dreine compétition pârouaîssiale acouo en allant. Et pis n'mantchiz pon la tente d'la Gâzette du Sé où'est qu'des expèrts d'Jèrri et du Rouoyaume Unni lus en vont distchuter tch'est qu'nou peut prédithe pouor la campangne siez nous.
Et l'Associâtion du Show du Vouêt a eune grand' confianche dans l'av'nîn. Assa, y'a d'tchi tchi va au piéthe, mais y'a d's amendements à d'aut's bords. Au drein show en 2002, les produits êtitchettés Genuine Jersey n'taient dgéthe mentionnés, mais ch't' année les v'là fièrs coumme pînchon dans la tente du Miyeu d'Jèrri. Et aniet ous allez vaie des compangnies tchi c'menchîtent coumme des spécialistes agricoles et horticoles mais achteu il' ont êlaîsi lus affaithes et avanchent à grands pas. Et les cheins du show sont bein heutheurs d'atchilyi toutes les dgaîngues dé bouonnes gens tchi travâlent à seule fîn d'prêsèrver la bieauté d'la campangne Jèrriaise.
Lé show 2004 mouontre étout coumme tchi qu'les difféthentes îndustries peuvent travailli ensembl'ye pouor faithe la promotion des couôteunmes dé Jèrri, et les cheins du show sont r'mèrciants pouor lé souôtchein tch'il' ont r'chu du Tourisme dé Jèrri et d'Rathbones, ieune des pus grandes compangnies pouor la gestion des finnances dans l'Île. Combein qu'j'avons d'sponseurs et d'parchonnièrs tch'ont aîdgi auve l'organnisâtion du show – y'en a bein trop à les mentionner touos, mais les cheins en chèrge m'ont d'mandé d'èrmèrcier, tout spécialement, les Tchênaults pouor l'usage d'lus tèrres chu weekend coumme siez-sé du Show du Vouêt 2004 présenté par la Gâzette du Sé.
Et ayant dit tout chenna, i' n'faut pus landrinner – lé show est ainchîn lanchi!
Viyiz étout: