J'n'en rveins pas quand j'pense à touos les changements qu'n'ou vaie en s'promenant dans la compangne dé nos jours. Comment qu'les fèrmes ont changi, et les récoltes étout. Lé temps pâssé toutes les fèrmes avaient tchiques vrégies d'avoût et nou viyait tréjous les vieillottes dé fain, dans les clios en été, et des grand tas d'raves en hivé, y'avait des tas d'êtrain et des tas d'feûgiéthe étout. Toutes les fèrmes avaient des maies d'feunmyi , et les fèrmiers sauvaient tout lé pathage des fôssés pour couvri lus rachinnes en hivé. Ach't'heu, i'n'y'a presqué pas de rachinnes de crues et les fôssés sont copés avec eune machine qui réduit tout en poudre, et les vacques sont au jour d'anniet, nouôrries sus du 'silage' à la pliaiche dé rachinnes. Lé temps passé, un fèrmyi gagnait sa vie et la sienne dé sa fanmil'ye sus p't-être eune quarantaine dé betes à corne, deux'trais couochons, et à bein près vingt vrégies d'patates Rouoyales. La tèrre 'tait bein nouôrrie dé conré et dé vrai. Avec ch'na il' arrivaient à payi lus c'min et d'pus, savaient assez d'sou pour acater eune fèrme.
B C Gilbert
Viyiz étout: