La Vie d'un Fermyi
Et La Fîn Des Menteurs
Moussieu l'Editeu
'Tchi drôle dé temps, man Ph'lip!' dit la Merrienne hier au sé. 'Le matin i'fait bé,dans l'arlévée i'veint d's achies, épis dans la séthée y'a ocquo di bieau solé.'
Ch'est eune vaque Jèrriaise
|
'Lé temps, ma Merrienne, est comme la vie du fermyi' j'li dis.'Une année, n'y a pas d'obgelée et ses patates se vendent à bouon prix. Tout va bein, mais la préchaine année ses potates sont rôties au l'vage, i'n'fait prèsque rein sûs 'l'bridge', sa bouonne vaque, tch'avait fait l'preunmié prix au 'show' l'année dé d'vant, attrape une fièvre d'lait et crève, i' r'chet d'sales lettres de san marchand d'gouaino et du gérant d'sa banque et quand veint Noué, i' n'a pas les sous pour acater un picot. Vais-tu àch'teu, chein que j'veur té dithe?'
'Chein que j'vais' ou dit, 'ch'est qu'tu d'veins un philosophe sûs tes vièrs jours. Mais àch'teu, Ph'lip, as-tu r'mèrtchi qué l'Juge Vouaisin a changi hardi?'
'Tout l'monde ont r'mèrtchi chenna' j'li dis 'et en sont bein contents. I' vos les ramâsse, les pend'loques tchi veulent faithe du brit en Ville, et vos les fiche en prison pour deus ou trais mais pour lûs apprendre. Avec un Magistrat comme li, nos jeunes 'policemans' et l'tchan, y'a pûs d'protection pour le publyic àch'teu.'
'N'oublie pas nos bouons Chentnyis' ou dit. 'Ch'est yeux tchi présentent les causes.'
'Oh, nos bouons Chentnyis' j'li dis. 'Il est vrai qué ch'est veux tchi présentent les causes, mais sans la police salariée i' n'y'en éthait pas tant à présenter. Liet la gâzette, et dis-mé tchèsqu'i fait l's arréts.'
'P't-être bein' ou dit 'mais auprès tout un 'policeman' est péyi, mais un Chentnyi donne san temps pour rain. I'faut être juste, man Ph'lip.'
Ou s'tut pour tchiques minutes épis: 'Chein que j'trouve tèrriblye' ou dit, 'ch'est d'vaie tant d'ches jeune menteurs d'vant l'Juge. I'sont témoins, mais i' n'ont autchun respect pour la véthité. Heutheusement, l'Juge Vouaisin n'les crait pas, mais ch'est grand dommage tchi' n'peut pas l's envier en prison pour le crime de parjure. Quand j'tais p'tite fille je n'éthais pas ôsé dé dithe un mensonge à pépée ou Mémée, mais àch'teu i' n'y a autchun respect pour la véthité.'
'Quant à chenna, Merrienne, j'n'peux pas m'fliatter qué j'tais miyeu qu'un autre quand j'tais p'tit' j'li dis, 'et pûs d'une fais Mémée criyait que j'disais la véthité, quand ch'tait un mensonge. J'faisais l'êcole bissonièthe et j'allais cherchi des nids, quand j'éthais deu être à l'êcole, mais un dinmanche au sé le prédicateur m'êffritit hardi en disant qu'les menteurs sé trouv'thaient en enfé avec satan les fichant dans l'mitan d'un feu, tchi n's'éteignait jamais, avec une longue frouque. Je n'dormis pas chutte niet-là et pour pûs d'un mais j'mé gardit dé dithe un seul mensonge, mais en viellissant jé si v'nu à craithe qué l'djiablye a 'té forchi d'aggrandi sa d'meuthe et san feu, et j'doute étout tch'i n'c'menche pas à s'lâsser.'
'Hélas !' ou s'fit, 'faut espéther qu'chu prédicateur-là s'trompait, car autrement j'ne r'vêrrons pas hardi d'Saint Ouënnais ouèsque té et mé j'espéthons d'aller quand i' s'sa temps dé dithe à bétôt à chu monde. Mais, Ph'lip, pâslons àch'teu d'autre chose car tu m'as fait tremblyier. La Bataille dé Flieurs est la s'maine tchi veint. As-tu idée d'y aller, car mé j'm'en vais rester siez-mé?'
'Et mé étout' j'li dis, 'car la dernié fais qu'j'y fus, j'en eut assez pour lé restant d'ma vie. J'fus assis là pour des heuthes dé temps sans pouver bouogi, pas même pour mé souôlagi, et quand vint la bataille, je fus prèsque aveuglyi par une grôsse hardelle tchi m'fliantchit une touffe dé flieurs dans la fache. Pour agver tout i' y'avait une telle foule dans l's auberges que j'n'pouvais pas appréchi pour une pinte dé bièthe.'
'Ne conte pas des mensonges' ou dit ' car quand tu rentrit dans l'bel tu t'en fut dans l'êtablye ès vaques, criyant que ch'tait la tchuisine, et j'eus bein d'la peine à t'mettre au liet. Mais, Ph'lip, i' faut espéther tchi f'tha bieau temps, car autrement tout l'spectaclye pouôrrait être ruiné. Il est vrai que l'comié prennent la précaution dé vendre lûs billets en temps, mais ch'né s'sait jamais la même chose. Pense à la pouôre 'Miss Battle of Jersey' exposée au vent et à la plyie. Nou n'voudrait pas la vaie trempée.'
'Bein seux qu'non' je m'fis, 'mais oulle éthait tréjous la satifaction d'saver qu'y'en éthait des chents aussi pièthe comme li, et qu'ou n'éthait pas en dangi d'attraper un coup d'solé.'
Dé là, Moussieu, j'nos mimes à pâsler des réunions dans certaines âraisses et la Merrienne dit qu'oulle avait 'té bein surprinse dévaie qu'à Saint Louothains, Saint Martin et Saint Brélade, lé rât n'avait pas hauchi. 'R'garde Saint Louothains' ou dit 'avec un rât de trente sous. J'ai tréjous dit qué l'John Baudains est un raide bouon Connétablye.'
'J'n'ai rein à dithe contre lé John Baudains, ou contre les autres Connétablyes' j'li dis, 'mais tandis tchi veindra touos l's ans d's'Angliais tchi n'savent pas la difféthence entre un quarthi ou un sièztounyi, lé rât n'hauchitha pas. Tout ch'que l'Secrétaithe d'la pâraisse à faithe ch'est d'additionner les chents d'nouvieaux quartchièrs et l'affaithe est faite.'
'Et pourtchi' ou d'mandit, 'qué chenna n'peut pas s'faithe ichîn à Saint Ou?'
'D'mande au Max Lucas' j'li dis 'et i' pouôrra t'explitchi. Mais àch'teu, Merrienne, pour tan membre d's Etats tchi s'en allait en Russie, est-i' ocquo d'la même idée?'
'J'n'si pas trop seuze' ou dit' 'car i' pathait qu'la Russie s'en va bétôt en dguêrre et contre sa volonté i' pouôrrait s'trouver enrolé dans les Grenadiers.'
PH'LIP
23/7/1960
Viyiz étout: