Èrmèrtchiz la date: lé 22 d'Juîn '22
Les Êlections lus en vont changi
Lé 22 d'Juîn 2022 ou pouôrrez voter pouor les cheins qu'ou voulez qu'i' r'présentent vos avis pouor les quat' ans à v'nîn dans l'Assembliée d's Êtats - lé parlément êlu d'Jèrri.
Apprannez comme tchi voter et comme tchi qu'les dreins changements à la vot'tie vos touch'chont
Vot' Île, Vot' Vouaix
L'Assembliée d's Êtats prend des décisions tchi touchent la vie à touos nous. Du nivé d'taxe, à comme tchi qué j'protégeons l'bel envithonnement natuthé d'Jèrri; du finnancement d'nos êcoles, à comme tchi qué jé d'livrons la souongn'nie d'la santé à tout l'monde.
Ch'est d'amain et aîsi d'faithe san d'ver en votant à seule fîn qu'les cheins êlus à l'Assembliée d's Êtats r'présentent touos les gens d'Jèrri, n'împorte où'est qu'ou d'meuthez, tchil âge qu'ous avez, ni dé iou qu'ou v'nez.
Y'étha tchiques changements à l'Êlection Généthale dé 2022
Tch'est qui chang'gea pouor l's êlecteurs?
N'y'étha d'aut' dé Sénateurs
Lé nombre dé Députés s'sa haûchi d'29 jusqu'à 37
Ou vot'tez pouor vos Députés dans iun des neu nouvieaux Distrits Êlectoraux
N'y'étha fis d'âme êlu sans vot'tie
Ou pouôrrez chouaîsi d'voter par la poste ou en pèrsonne
Tch'est qu'chenna veurt dithe pouor vous
Des distrits ont 'té grées à seule fîn d'èrêgaler mus la distribution d's êlus l'travèrs d'la populâtion d'l'Île.
Apprannez dans tchi Distrit Êlectora qu'ous êtes en vîsitant Vote.je/districtfinder
Ou pouôrrez voter pouor 'Fis d'âme des Susdits' s'i' y'a l'même nombre ou mains d'candidats qu'lé nombre dé postes à êlithe
Ou pouôrrez voter d'vant l'êlection sait par la poste sait à l'avanche, ou bein l'jour d'l'êlection en pèrsonne à eune pliaiche dé vot'tie
Tch'est qui n'chang'gea pon?
Lé rôle du Connêtabl'ye reste sans changi dans châtcheune des 12 Pâraisses
Y'étha tréjous 49 Membres des Êtats, châtchun ou chatcheune ayant eune vouaix êgale dans les d'bats entouor l'av'nîn d'Jèrri
Touos les membres es'sont êlus à lus postes pouor quat' ans
L'âge du minnimum pouor la vot'tie reste à 16 ans
Ch'est aîsi d'voter
J'peux-t-i' voter?
OUI, si'en cas:
Qu'ous éthez 16 ans ou pus l'22 d'Juîn 2022; ET
Qu'ous éthez d'meuthé en Jèrri au mains d'pis deux ans jusqu'au 22 d'Juîn 2022; OU
Qu'ous éthez d'meuthé en Jèrri au mains d'pis siêx mais jusqu'au 22 d'Juîn 2022, et auve chenna eune pause tch'êgale en tout chînq ans
Comme tchi qué j'vote?
Preunmiéthement, ous avez à vos enr'gîstrer
Ou pouvez l'faithe:
En lîngne: vîsitez Vote.je/register
Par la poste: renvyez la forme d'enr'gîstrâtion qu'ous éthez r'chu d'vot' Pâraisse
En pèrsonne: vîsitez vot' Salle Pârouaîssiale
Un co qu'ou vos s'sez enr'gîstré, ou pouôrrez voter. Y'a trais mouoyens d'tchi qu'ou pouôrrez voter dans l'Êlection Généthale 2022
Par la vot'tie postale
En pèrsonne par la vot'tie à l'avanche
À vot' vot'tie d'par siez vous l'22 d'Juîn
J'nos'n'allons vos înformer des dêfinnissâles d'la vot'tie postale et à l'avanche sus Vote.je
Comme tchi qué j'saithai pouor tchi voter?
Touos les candidats à l'êlection s'sont annonchis en lîngne et dans les médias Mêcrédi l'18 d'Mai.
Un livret tchi contcheint touos les mannifestes - Un raccourchi d's avis et promêsses des candidats - s'sa posté à châque démeuthe et publié sus Vote.je et chenna auve un p'tit vidgo dé châque candidat et candidate.
Les rêunnions êlectorales sont d's assembliées dans tchi qu'ou pouvez d'mander des tchestchions ès candidats dans vot' Pâraisse et Distrit entouor chein tch'est près d'vot' tchoeu, Ches rêunnions prendront pliaiche dans les s'maines dévant l'jour d'l'êlection.
Dé tchill' affaithes qu'ou voudrêtes qué les candidats lus en d'mentent?
Les dêfinnissâles des rêunnions êlectorales es'sont publiées sus Vote.je pus près d's êlections. Dans l'entrétant, ou pouvez nos faithe assaver d'tchill' affaithes qu'ou voudrêtes vaie distchutées ès rêunnions êlectorales.
Tch'est qu'ous avez près du tchoeu?
Tch'est qu'il est d'mêtchi d'changi?
Tch'est qu'il est d'mêtchi d'prêsèrver?
Faites-nous assaver sus Vote.je/hustings ou en scannant l'code QR.
Vot' almonnas d'l'Êlection '22
Avis'-ous dans tchi nouvieau Distrit Êlectora qu'ou d'meuthez en vîsitant Vote.je/districtfinder
Enr'gîstr'-ous pouor voter par 12h méjeu l'17 dé Mai
Chouaîsissez les candidats qu'ou voulez qu'i' vos r'présentent
VOTEZ! Sait par la poste, à l'avanche sait l'Jour d'l'Êlection: l'22 d'Juîn 2022
S'mett' sus les rangs
En sé m'ttant sus les rangs, ou pouvez bein changi d'tchi pouor Jèrri achteu et à l'av'nîn.
Ou n'avez pon qu'faithe dé v'nîn d'tchique bord en partitchulyi, ni d'aver tchiques qualificâtions, ni d'l'expéthience spécifique. Les Membres des Êtats prannent des décisions tch'ont un r'êffet sus tout l'monde et chein tchi vaut sustout ch'est qu'l'Assembliée d's Êtats èrprésente les gens d'Jèrri dans toute lus divèrsité.
J'peux-t-i' m'mett' sus les rangs?
Pouor vos mett' sus les rangs pouor Membre des Êtats ous avez raîque à:
Connêtabl'ye
Député ou Députée
Aver au mains 18 ans
Êt' un Citouoyen ou Citouoyenne Britannique
Aver 'té résident(e) en Jèrri au mains d'pis deux ans jusqu'à l'êlection OU résident(e) en Jèrri d'pis siêx mais jusqu'au d'vant l'êlection, et en tout chînq ans d'vant chenna
D'meuther dans la Pâraisse ou l'Distrit qu'ou voulez r'présenter
Comme tchi m'mett' sus les rangs?
Les nominnâtions s'sont ouvèrtes entre 10-12 dé Mai 2022. I' vos faudra un proposant ou eune proposante et acouo neu supporteurs pouor vos nonminner, tchi daivent aver l'drouait d'voter dans l'Distrit Êlectora dans tchi qu'ou proposez d'êt' êlu(e). Y'a étout d'aut's changements d'la procéduthe êlectorale entouor les candidats.
Tch'est qui s'en va don changi pouor les candidats?
La procéduthe des nonminnâtions s'en va changi. Les nonminnâtions s'sont publiées sus Vote.je auprès la date lînmite pouor les nonminnâtions, au run d'êt' annonchies dêliêment. V'là tchi donn'na assez d'temps pouor la vérificâtion des papièrs dé nonminnâtion et la rêsolution d'autchuns ohièrs.
Nou-s-a haûchi combein d'sou qu'les candidats peuvent dêpenser duthant lus campangnes. La période dé la dêpens'sie d'campangne quémenche lé 22 d'Févri 2022, ch'est en tchi les candidats éthont à garder lus comptes dé chutte date-là. Ou trouv'thez les dêfinnissâles sus Vote.je.
S'ous êtes à penser à vos mett' sus les rangs, en sachiz pus long en vîsitant Vote.je
Viyiz étout: