Moussieu l'Editeu,
"As-tu ouï," j'd'mandit à la Merrienne l'autre sé, "qu'les membres d's' Etats s'en vont être péyis?"
"Et tchêsque tu nos chante, la?" ou s'fit. "N'sait pon si achocre, don, Ph'lip."
"Mais ch'est la véthité, bouonnefemme," j'l'y dis. "J'l'ai veu sûs la gâzette."
"Comme je t'l'ai dit chent fais," ou réplitchit, "l'encre et l'papi ne r'fusent rain. Et y n'y'a que d's'inouothans comme té tch'avallent toutes chais menn'ties-là. Péyi les membres d's'Etats! Eh ben étout!"
"Tu peux dithe chen qu'tu voudras," j'l'y dis, "mais chutte fais tu t'trompe, car tan n'veu Liaiësse rapportit la nouvelle de la ville hier. Ch'est l'y-même tch'y m'l'a dit."
"Y n'a jamais tait ben dans sa tête ch't'y-là, depis qu'sa mémée fit la mêprinze de l'y donné d'la med'cine que l'vétérinaithe avait envié pour une vaque tch'avait tchique maladie dans les rignons. Mais, enfin, t'a't'y dit combain qu'nou s'en va lûs donné?"
"Nânin, car ch'n'est pon acquo tout-à-fait décidé, mais sans doute les Députés d'mand'dont au mains quatre chents louis par an."
"Pas pûs? Grand doûx d'la vie, tchi modéthâtion, considethant qu'y'en a d'yeûx tch'y sont dans l's'Etats sans dithe un mot. Mais ach'teu, les Connêtablyes. Ne m'dis pas tch'y s'sont satisfaits avec quatre chents louis. Après tout, un Connêtablye vaut mûs qu'un simplye Député."
"Tchiquefais," je m'fit, "pas tréjous. Mais sûs un sens, tu'as raison. Faut dithe siez chents pour un Connêtablye à qu'menchi."
"Bon! Ach'teu, les Jurés. Au tout mains mille louis, êsche-pas?"
"Véthe," j'l'y dis, "au tout p'tit mains, car ch'est tous des membres de nos grandes familles, et che s'sait une insulte d'allé lûs offri des p'tits salaithes. Oh, véthe-dja, mille louis sans doute, ch'est à dithe, si nos en reste."
"Tchi - des Jurés ou des sous?"
"Des Jurés. Y'en a tch'y veulent dithe tch'y s'en vont dispathaître souos la nouvelle constitution."
"Jamais je n'craithai chonna," s'fit la Merrienne. "Nos chiers Jurés, tch'y pathaissent si ben dans lûs rouoges robes. Aussi ben aboli l's'Etats tandis tch'ils y sont."
"Même oponion," j'l'y dis. "Si nos Jurés n'taient pas là pour mettre les fermiers à l'amende et les fripons en prison, aussi ben abandonné l'affaithe. Mais ach'teu y faut caltchulé combain qu'tout chonna s'en va nos couôté."
"Arrête une minute," dit Merrienne, "tu'as oublié les Recteurs."
"Pas du tout," j'l'y dis. "Tu dev'thais savé qu'nou s'en va les happé par la pé du co et les mettre à la porte. D'vant long quand un recteur voudra allé ès Etats, y faudra tch'il aille s'assiéthe dans la gall'lie avec les viers barbus et les vieilles filles. Autrement, j'éthais sugéthé les mêmes salaithes comme les Jurés."
" Et mé, j'éthais dit pûs," s'fit la Merrienne. "Après tout, nou peut tréjous ramâssé un Juge, mais r'garde combain longtemps qu'j'avons tait ichin à Saint-Ou, d'vant pouvé trouvé un Recteur. A Saint Martin ch'tait la même chose, et les Saint-Piêrrais sont ocquo piéthes, car y cherchent et cherchent mais n'en trouvent pon. Y sont rares, de nos jours, les Recteurs."
"Et pourtant, ch'n'est pas une mauvaise djobbe," je r'mert'chit. "Quatre chents louis par an, une maison, un bouon gardin, sans pâslé d'autre chose. Comme tout va, ch'n'es pas tant piéthe. Si j'tais jeune garçon - "
"Tu f'thais comme tu'as fait," dit la bouonnefemme. "Allons, bouoge té, et pelle deus-trais patates pour not' soupé."
Ph'lip
Viyiz étout: