Les Pages Jèrriaises

Les Estats

L'aut' jour je vis l'assembllèe
Qu'nouz appele les Estats
Qu'est si drôlement composèe
Que ou f'rait bein rire les cats.

Sus le banc des magistrats
Nouz en vait de pus d'une mere
Mais qu'i faichent lus travas
Che n'est pas là men affaire

Nou m'y montri un gros homme
Qui n'qtient à cllou ni à c'ville;
Si je n'me trompe nou l'nomme
Mousieu le juge ................... (1)

Il a l'air d'un bouan vivant,
L'encoleure d'un touoré.
Par driere et par devant
Il est rond comme un tonné.

Y-en a iun à barbe grise
Qui sans doute s'creit bein grand,
Et qui pour nouz en d'vise
Va s'prom'ner hors de san banc.

Un ministre qui s'engnie
Aupres d'un autre ahonni,
Montre qu'il a grande envie
D's'acclliaser et frume l'yi.

Chti-là n'a pas la brélue
Quand il est comme inspirè;
Il a la langue bein pendue
Et le filet bein copè.

Un pouor vi quiq'chose brinotte,
J'pense que ch'est un mio d'mie d'pain:
Un autre rgarde sa botte;
Iun s'prépare à faire le train.

Chu dergni a d'la varvette,
Pus qu'nou n'crerait souos sen drap;
A l'ouir conter s-a sornette
Nou l'dirait un avocat.

Un saint-n'y-touche empesè
Est là comme une êtend-perche;
Un autre est embarrassè
Comme d'une enhalaude une gerche.

Un autre pouor rat d'égllise,
Qui, bein qu'i' n'seit pas un sot,
A pourtant fait une sottise
Se tqient là en muche-ten-pot.

Un connêtable savant,
Qui pustôt voudrait l'paraitre
Dpis qu'i grimpi sus l'Mont Bllanc
Se creit, dame, un divers Être.

Iun d'ses vaisins, fier bégaus,
Ne dit mot, jamais ne d'vise;
Mais comme la jument Rabaud
I' rit parfeis d'sa sottise.

A vrai dire ch'est un bachouard
Qui-a fait pus d'une bêtise;
I' connait bein l'Mont Fêlard
Et rêpond au nom de ....... (2)

Ch'est parmi les Députés
Que nou veit ch'qu'il y-a d'pus drôle;
Mais je n'peux pas en une feis
De chacun r'presenter l'rôle.

Iun d'ieux à l'air d'un Angllais,
Il a un bouan divulguere;
En angllais comme en français,
I' conte assez bein s'n affaire.

Un deuxième est v'nu fameux
Dans l'marchi faisant s-a ronde,
Dans l's Estats s'corlant les c'veux
Et en criant "Je seconde". (3)

Il a l'esprit viscasiè
Car i voulait faire accrere
Qu'il y-a d'la proprietè
Ni mobiliere ni foncière.

L'trêsieme est un ptit laidure
Qui n'parait aveir que l'vent;
I' n'fait pas mauvaise figure,
Nou l'entend pâler souvent.

Y en a iun qui n'fait qu'cllin'nter
Un autre est comme une image
Un autre semblle hauter;
Ch'est d's ouaisiaux sans ramage.

Deux des nouviaux-arrivès
Sont à peu pres d'la même pâte;
Quand j'en s'rons dêbarrassès
J'pouorrons crier bouonne dêb-âte.

Iun d'ieux est un pouor pend-hueules,
L'autre est salope et bruta;
I' faut que che sait des peuilles
Qui nouos aient chouaisi chonna.

Le prumi, je l'ai oui dire,
Ne peut pas se gouverner;
Du deuxieme nou n'fait qu'rire
Quand i' se dmente de pâler.

L'un et l'autre êpirotè
Erprésente s-a paraisse,
Comme un cat-huant êgaluè
Qui d'sortir trop tôt se presse.

Si ch'est que nou ouet le brélan
Qui s'y fait nou trouve chonna drole;
Nou se r'souveint de Mait' Damian
Qui n'craignait ni n'tait craint d'l'êcole.

Si jamais i' font aut' chose
Que de voter, m'est avis
Que ils attendront une pose,
A la s'maine es treis Jeudis.


1 de Quetteville
2 Edouard Denize
3 Jean Thomas du Jardin

(P.L.)?

Acouo eune vèrsion:

Les Estats

L'aut' jour je vis l'Assemblée
Qu'nouz appele les Estats:
Oulle est tellement composée
Qu'ou f'rait bein rire les cats.

Nou m'y montri un gros homme
Qui n'tgient à cllou ni à c'ville;
Si je n'me trompe nou l'nomme
Mousieu le juge ...................

Il a l'air d'un bouan vivant,
L'encoleure d'un tuoré;
Par driere et par devant
Il est rond comme un tonné.

Je vis un bouan vier garçon,
Assez savant et habille;
Pour finir s'n éducation
I' 'li faudrait un' bouann' fille.

J'en vis iun à barbe grise
Qui sans doute se crait bein grand,
Et qui pour que nouz en d'vise
Va s'promner hors de san banc.

A l'vaîr comme un badleran,
Ov les deux mains dans ses braies,
Se rengorgir comme un poan,
I'fait penser à des ouaies.

Un autre est un bel ouaisé
Qui fait envie es hardelles;
S'i n'se dêpèche, ma fé,
I'fra languir bein des belles.

Un ministre qui s'engnie
Aupres d'un autre ahonni,
Montre qu'il a grande envie
D's'accllasser et frumme l'yi.

Chti-là n'a pas la brélue
Quand il est comme inspiré,
Car sa langue est bein pendue
Et sen filet bein copè.

Un pouor vi quiq' chose brinotte,
Ch'est ptêtre un mio de mie d'pain:
Un autre rgarde sa botte;
Iun s'prépare à faire le train.

Chu dergni a d'la varvette,
Pus qu'nou n'crérait souos sen drap;
A l'ouir conter sa sornette
Nou l'dirait un avocat.

Un saint-n'y-touche empese
Est là comme une êtend-perche;
Un autre est embarrassé
Comme d'une enhalande une gerche.

Un autre pouor rat d'égllise,
Qui bein qu'i' n'sait pas un sot,
A pourtant fait une sottise
Se tgient là en muche-tan-pot.

Un connêtable savant,
Ou bein qui voudrait l'paraitre;
Dpis qu'i grimpit sus l'Mont Bllanc
Se creit, dame, un divers être.

Un espece de bégaud
Reste là comme une devise,
Et comme la jument Rabaud
Rit parfais de sa sottise.

Un autre à une petite vouaix
Comme une modeste fillette;
Il est bein llain d'êtte un gniais,
Il est malin comme une chouette.

Ch'est parmi les députés
Que nou vait ch'qu'il y a d'pus drôle,
Mais je n'peux pas en une fais
De chacun rprésenter l'rôle.

Iun d'ieux à l'air d'un angllais,
Il a un bouan divulguere;
En Angllais comme en Français
I'conte assez bein s'n affaire.

Un deuxième est vnu fameux
Dans l'marchi faisant sa ronde,
Dans l's Estats s'corlant les cveux
Et en criant "Je seconde".

Che fut pour li qu'Alavaine
Se servit d'un vilain mot;
Je ne sis pas sa marraine,
Qui ne dit rain n'pâle pas trop.

Il a l'esprit viscasiè,
Car i' voulait faire accrere
Qu'il y-a d'la propriêtè
Ni mobiliere ni fonciere.

L'trêsieme est un ptit laidure
Qui n'parait aver que l'vent;
Mais i' fait bouanne figure,
Nou l'entend pâler souvent.

Un assez biau rouoge garçon,
Qui bein seux n'est pas trop bête,
A de la vouaix, d'la raison
Et des boudins dans la tête.

Iun d'ieux ne fait que cllin'ter
Un autre est comme une image;
Sen vaisin semblle hauter;
Ch'est des ouaisiaux sans ramage.

Deux des nouviaux-arrivès
Sont à peu pres d'la même pâte;
Quand j'en s'rons dêbarrassès
J'pouorrons crier bouonn' dêbate.

L'un et l'autre êpirotè,
Erprésente sa pâraisse,
Comme un cat-huant êgaluè
Qui d'sortir trop tôt se presse.

Sus un fauteuil jusqui haut,
Iun parait en pénitence,
Et prend des pinchies de sno.
Pour aver de la patienche.

Quand nouz entend la brelan
Qui s'fait, chonna parait drôle;
Et nou pense à maitr' Damian
Qui n'était pon craint d'l'êcole.

Un Jersiais

La Lanterne Magique
28/12/1872 - 4/1/1873

 

Viyiz étout:

 

Les Pages Jèrriaises