|
Un jour que not' mère, en ville Nos zaquatit du paîsson, Nia longtemps;.. j'étais p'tite fille, Tu n'étais qu'un avorton; Ou les mins dans son armoire I' l'était ben pévrai, salet, J'n'en ai perdu la mémoire. Aimes-tu la sardinne, valet? Quand la tablle était dréchie, Et que l'âtre pétillait, Et qu'nos gens étaient rangis Otou d'lu thée qui fumait, Le paîsson au coin de l'âtre, J'en étais idolâtre, Embâoumait!.. J'en ai l'hiquet. Aimes-tu la sardinne, valet? Unne matinaie que not' mère, Ordinairement bouonne mégère, N'frumit l'hus de son armoire En allant à ses affaires, J'ly happi à la sourdine Jusqu'à iunne et deux sardinnes, Que je rôtis à notre crasset. Aimes-tu la sardinne, valet? Not' nère catte, la querouogne, Au coin du feu me guettait, Com' sou l'avait ieu la rouogne Les babines ou se liquait, Veux-tu en savé le fin mot, J'liérais ben rompu le co? Ou l'etrueulit chu crasset. Aimes-tu la sardinne, valet? Penses que chutte maudite catte En m'viyant le dos touôné, Tout douochement allouogne la patte Et happe mes sardines tout dret. Dans un cllin d'gui, ou les croque, Quest qu'en eut un grand depiet? Pour de mé j'en s'rais ben morte! Aimes-tu la sardinne, valet? 1849 |
Viyiz étout: