Oh! y dis chés d'la chervette et qu'est belle vraiment,
Et mé j'pensi que j'lis f'thais le méme compliment.
Et vous t'chi paison qu'ou z'avais que j'lis dis mousieu
Mé, qui dis, j'ai deuex-streais lanchons et eun tout p'tit lieu;

Que i'veins d'prendre à eun Français là bas,
Mais au vôtre, y dis, i'n'y touchait pas,
Car la chervette nou n'a pas faithe de choiesi,
Mais y'n faout pus prendre d'aoutre paison trop p'tit.

Je vi bein que tchet l'inspecteur, l'en sçait pas san nom,
Mais je sçait bein qui vos happe quand nou za de trop p'tit paison.
Y dévthais au meins avé eun gallon sus l'bras
Car aoutrement nou n'les r'connais pas.

Penseais si par malheur eun p'tit lieu j'avais prins
J'en éthais yieu tout d'eun coup pour chinq gros chéleins,
Et tout men paison éthait tet confistchit,
Et pis j'aithaies t'y ertrouvet man pangni.

Devant l'vais j'avais preins eun p'tit vrat
Que j'meins dans m'en pagni pour le donné au cat,
Et pis j'erpensi, pourtchit l'emporté,
Et chu pouore petit je l'renvyit à la mé.

Mais penseais si par malheur j'lavais gardet
J'éthais ti tet aitout bein attrappet,
J'ein paie pas de tax pour man cat,
Mais j'en éthaies payi eune bouanne pour m'en vrat.

Je prendrai bouan soin quand j'ithai au lanchon,
Quand j'verrai l'homme qui prend le p'tit paison,
De prendre la course quand le l'verrait v'nin,
Et du d'giantre si pouora m'atrappé.

La loie est bouanne si ou voulaies,
Si ou n'tait pas si strictement gardeaie,
Y foaut dont tréjous avé eun pi de roié sus sé
Pour tout paîson qu'nou z'atrappe de pouvai l'mzuthai.

Tandis que n'ou sçait à le m'zuthai
La mé ne manqu'thait pas de monté,
Et pis nou n'éthait pas de "nice" paison
Et pourtant chest eun fricot qu'est si bon.

Les gens qu'y vont seulement par paiezi
Peuvent prendre tout lus temps à l'choiezi,
Mais pour les siens que chest lus maîtchi
Il y perdrais tout lus temps et lus profit.

Et pourtant y n'ont pas de grands profits,
Chest pouore paîetcheuers qui risque lus vie,
Souvent y sont obligis de travaillyi longtemps
Pour donné de bouan fricots est grands gens.

Le Poet Français dit vrai quand y dit:
Dans la mer comme dans la rivière,
Tout poisson vit à sa manière,
Et par tous les animaux
Les petits sont mangès des gros.

LIVONIA.