"Eh bein! Avous jamais ouï d'ité?" s'fit Mêrayieu l'aut' sé
en liaisant la gâzette; "Mangi des cats? V'là tchi m'fait mal au tchoeu d'y
penser!" "Tch'est qu'tu'es à nouos chanter, don?" j'li dis: "C'menches-tu à
r'doter?" "Nannîn," ou m'rêponnit: "liet ch't'articlye-là pour té-même, si tu
n'mé crai pon! I' pathaît qu'un tas d'personnes ont mantchi lus cats en ville,
et qu'des gens ont veu des pieaux d'cat fliotter dans la cauchie, et qu'eune
dame a acaté du poulet tchi r'semblye pus à du cat qu'à du poulet!"
"Bah!" j'li dis: "En v'la-t-i', un tas d'niolîn! Ch'est seux
qu'ch'est exagéthé. Iun d'ches jours tu trouv'thâs que deux'trais femmes on
fait un patafias d'rein du tout!"
"Quant à mé, j'sai bein qu'j'aimethais mus mangi du cat que
d'créver la faim - et du tchian étou! Sans doute ch'n'est pas d's'animaux qu'nou
chouaisithait pour met' au fou pour le dîner du Dînmanche, car nou-s est
accouotumés à l's aver alentou d'sé touos les jours. Mais v'la tch'i' n'veur
pas dithe que nou n'en f'thait pas un bouan fricot! L's'Allemands 'taient bein
contents d's'en litchi les babinnes ieux, quand i' vintent à court de viande et
de j'va!"
"Vaithe dgia!" s'fit Mêrayieu: "Il' éthaient mangi autcheune
chose! I' 'taient dêgouotants et malauc'seux, ches salopes-là!" "Allons,
Mêrayieu," j'li rêponnit, - "J'n'les aimais pas pus qu'té, ches
tout-au-travèrs-là, - mais i' n'faut pas oublier que quand eune personne a
grand' faim, ou' n'est pas hènitcheuse. Et pis, étou, ch'est eune affaithe dé
goût!"
"Ergarde les chînouais, par exemplye. I' pathaît tch'i'
n'aiment pas l's'oeus frais, - i' trouvent l's'oeus bouans quand i' sont à la
maintchi pouorris. V'là tch'à pus d'goût. En pâlant d'cats, j'ai ouï qu'les
Chînouais l's'aiment hardi étou, et tch'il' ont l'goût du lapîn.
"Dans hardi d'pays iou qu'lé monde sont aussi civilisés
qu'nous, i' mangent des fricots que j'naimons pas en Jèrri. Ergarde les
Français, ieux. Il' aiment bein les colînmachons et la viande de j'va!" "Té et
tes colînmachons!" s'fit Mêrayieu; "Tu peux l's'aver, - quant à mé, i' faudrait
j'éthais grand' faim pour mangi d'ité!" "Mais, pourtant," j'li dis: "Ch'est
d'tchi bouan, - et la viande de j'va est bouanne étou, - j'en ai mangi bein des
fais."
"Quand j'tais mousse, j'ai ouï man grand-péthe dithe que
dans la dgèrre de dgiex huit chent septante, les Parisiens avaient si grand'
faim tch'i' mangeaient même des rats!"
"Au Canada et en Améthique, i' mangent de l'ourse, et j't'asseuthe que ch'est bouan, - v'la tch'a
l'goût d'lard, et j'en mang'geais bein un bouan fricot ach'teu s'nou pouvait en
avait ichîn! Et en pâlant d'lard, iou qu'y'à pus sale qu'un couochon? Et
pourtant, t'en mange bein, du lard!"
"En Améthique, i' mangent des tchilieuvres, et i' pathaît
qu'i' n'y'à rein tch'a millieu goût qu'les serpents à sonnettes. Les gens
là-bas acatent ch'là prêsèrvé en tinne comme du saumon. Et i' mangent du rat en
Améthique étou, - mais ch'n'est pas du rat ordinaithe. Ch'est un anima grand
comme un p'tit tchian, tch'est appelé "Rat musqué" et v'la tchi craît lé long
des riviéthes v'la tchi vit sus des rachînnes de bouais et d'la verduthe tchi
craît lé long des riviéthes dans les forêts. Ch'est d'bouanne viande. Et pis
ly'à la viande de chèr et du castor et d'l'élan d'Améthique. Touos ches
animaux-là sont r'gardants de tchi qu'i' mangent, - ch'est pus qu'nou peut
dithe de bein des créatuthes que nous mange en Jèrri. ergarde les homards et
les crabes! I' sont carnivores, et j'les mangeons bein, nous!"
"Ah! Tais ta becque et va-t'en t'couochi," m'dit Mêrayieu.
"Nou dithait que v'la tch'i' t'fait pliaisi de touoner l'tchoeu au monde! Si
les gens dans ches drôles de pays-là n'savent pas mus que d'mangi un tas
d'salopsie d'même, j'm'en vais rester dans not' pétit Jèrri, mé!"
Chroniques de Jersey 12/3/1948
Viyiz étout: