| Me. JEAN | Bonjour et bouanne santé, Me. Philippe; comment va, vier garçon? avous ben dormi la niet passaie? |
| Me. PHILIPPE | Mais, ma fé, nennin; je n'ai seu dormir ni accliasser. Les garçons de d'siès nous ont fait une tait boucan toute la niet que je n'ai peu freumer l'yi. Crérious que chés mâtins la ont resté sus la jonquière jusqu'à signe de jeu, à faire des cartouches pour vot canon; et ma fé, ils n'ont fait de valiantes; je siès seux que le BULL-DOG lèvera le drière comme i faut. Pourveu qu'inne s'êtchieste pon oquore che nessa que mié ma. Mais qu' est ch'tinchin qui vain? I m' est avis qui craôule: i faut qu'il ait déjà la brelue. |
| Me. JEAN | Eh! semn'âge, ch'est Me. Charles; diable m'envers, vère, i craôule, il a déja veu la lune parsouos le tro, mais je pense qui n'en a pas encouore assez a bord; car le v'la qui' entre siès Me. Tom pour en supper une autre gorgie. Mais v'nouos-en que je pâlons de not bordês d'enniet. Aça, j' ai oui que je nos en allons ave une bouochie ylo à l'auberge; je ne sé pas s'il est vrai, car je ne pensi pon à en pâté à Me. Tom hier l'arlevaie; mais va qui ne ferait pas de ma à nos gens, va qui lus bâderait du queu. |
| Me. PHILIPPE (Prenant une prinse de sno et ofrant sa boëte à Me. Jean.) | Vère, ma fé, un gobin de boeu et un morcé de pain de blié ferait du ben à not monde. Et pis, comme i faudra nos en aller touos en une bodolière en ville, va qui les ferait s'afflioqui. Je n'ai pon pensai a demandé ès garçons de d'siès nous s'il ont des couleurs pour porter en tête de not guaingue; i nos en faudra. Mais p't' être qu'ouzy avais pensai, Me. Jean, car quand i s'agit d'élection ou pensais à tout. |
| Me. JEAN | Nou fait, pardingue j'n'y ai pon songi, mais j'ai not bull-dog prêt. Je le nettime yier, il tait tout roui; i fallait que nos gens l' eussent mins dans une plièche mucre, mais il est en bouan trim achet'eure: ou verrais comme i ouassesa bétôt. Les Trinnetais le ouiront, car le vent est d'vier le sud. |
| Me. PHILIPPE | Quand ou pâlais de vot bull-dog et des Trinnetais, va qui me fait r'penser à l'élection du mes d' Août passai. Dammibleud! en eus-je dêpiet don mé, Je n'érions pas deu le déhaller not canon, car chés pendloques la en enrent le vent, et va qui les fit en ramasser iun qui plièchirent à la Boucterie. Vos rappelons ben comme i tiraient? nou z'erai, s'emnâge dit que ch'tait des enragis, ou qu'il avaient le fortune dans la bieille. Je vos dis, Me. Jean, j'en eus un dêpied de fé; car i yen avait qui disaient que not bull dog était malade, et d'aôutres nos fouotaient ès yers qu'il avait du fraid et qu'il avait perdu la voés. |
| Me. JEAN | An, mais enfin, enfin, je vos dirai, nou n'peut pas tréjous gangni; mais pour de mé, je criais que nos gens s'en allaient bailli une fière latteure ès aigrefins de la Trinnetai; car Mons. Philippe - nos l'avé dit le Samedi de devant, mais nia pas de doute qu'il le pensait li-même: ch'tait les Roziers qui li faisaient a crére chonna; car entre nos deux, Me. Philippe, (ichin Me. Jean regardi autouor de li pour s'asseurer qu'i n'iavait pon corps d'âme que M. Ph. à l'écouter) i n'ien avait pas iun parmi les Roziers de la Trinnetai qu'y connussent aucune chose: ils taient touos a tâtons comme un flioquet de guignots dans une pouque, i lus érait fallu un homme comme chut aigrefin la qui porte des lunettes; ch' en est la don iun, un malin grivoiée. Mais ne v'chin une raccachie de nos garçons qui vennent: i faut allé bère une fés ov ieux; y vendrous, Me. Ph. je pâllons du fun que j'nos en alons avé bétôt. |
| Me. PHILIPPE | Nennin, j'nai pas le temps, car je n'siès pas oquo changi, et pis je siès tréjous si longtemps à me râsé! mais, allez tréjous, je nessé que deux fils de coton à saôuté dans mes brés; jez sé ov vous dans la faichon d'un tou. |
| Me. PHILIPPE | Eh! ben v'la occouore un biaux jeu de passai! Ma fé, ch'est dommage qui n' y en ait pas pus souvent d'itaits; car i semble que des bordaies comme chelle là, nos font rajeunir. Dammin! esche de qui bé don que de vés une trivelaine de vaillans ammins du Peuple s'en allé touous en ville, paque a coue, comme un flioquet de pirots! Et pis chest quand i crient touos hourras qui y a du fun! ma fé j'en jure, et pon n'en mens, i ien avait là quiques uns qu'ouvraient la bahueule si large que nou z'érait peu, Dia m'empor, lus couler un chabot dedans. Nos garçons de par ylo d'vi n'ont pas mauvaise organe, mais, mafé, les cheins du bas de la Ville s'en sont étout ben déhallais. Tout de même je cré que Mons. Ph. lus a bailli a bère à matin au Brétish, car i brayaient et faisaient des gringnes comme s'ils avaient avalai des querdons. |
| Me. JEAN | Mais ma fé, vere dia, ou pouvais compter dessus qu'il ont pus goudalai d'iaux-de-vie qu'une vacque ne peut avaler d'écaôudeures; et pis c'hest qui y en avé la des garçons qui peuvent en suppé! Avous prins avis à M. Jean C.? qui mine est qu'il avé, il tait plus verd qu'un pouoret; je jurerais que ch'tinna n'tait pon couochi a san lié à onze heures hier au sé. Il a restai à pâler une bouane volaie a Mons. Ph. drait aupi de mé. Je ne sé pon de quès qui baragouinaient, mais iun d'ieux r'gardé ses saoulers, et l'autre faisé des grimmaches comme un cat rôti. Sou z'y aviez prins avis, ou z'en eriez ieu bouan ji! - Mais savous ben que je sies marri mé? nou nos avé dit qui ieré une bouochie pour nous siès Me. Thom, et pis quand je sommes ervenus de la Ville, je n'avons peu seulement trouvé un crôtin à gimoler. Dammibleud! craieint-i que je pouorrions mangi nos cartouches. J' étais si fliat que j'ai laissi les garçons a tisonner lus Bulldog et m'en sies venu siès nous cherchi un bequet de lard et un bequet de chu bouan pain de blié. Eh! ben, Me. Philippe, esche quou criés que ch'est la ben agi à l'envers des Mont-au-Prêtriers? |
| Me. PHILIPPE | Nennin, ma fé; pour de mé, j'ai restai tout ébahi quand j'ai veu que Me. Thom n'avé pas une bouochie a nos bailli; mais quand ches messieurs nos éraient donné un gobin de viande, et conviès d'un verre de grog, en saient i morts pus pauvres? Si j'avais seu qui s'en allais nos joué une telle trique, je n'érais semn'âge pas criai hourra si haôut à matin; car oquo du pas qui va le gosi me broque comme si nou l'avé ramonai atout un trousset d'orquies. Et pourtant dès que je sies ervenu, j'ai prins une mogue, et m'en sies allé au drière de la futaille. |
| Me. JEAN | Ch'est quou n' en avais pas bu assez; j'ai ylo de bouan cidre quéru de l'année draine, qui vos rafraichira un mio la garguette, attendez; "Bettey, happe une canne, et va nos en hallé une gorgie, et si ne vain pas assez vite par la pinoche, halte le vrétot,..... Enfin, enfin, nou dira enfin, je pâlions de not bordaie d' enniet, et je m'en allais vos dire que va qui mia fait un fichu dépiet que j'ayons tait renviais comme des t'chans fouotais, mé quié tréjous tai prêt à tout faire pour man parti, quié, souvent dit ès gens que j'e vot'tais pour la rose, quand chessé un trou de chou, ou le Fortune li même qui 'sait sur les rangs; si y avé ieu un aigrefin sur les rangs, tésous, il n'éraient pas êtait si cracheurs. |
| Me. PHILIPPE | Tout de même, je cré que ch'est un oubli qu'il ont fait, car i savent ben que ch'est du choeu de quesne que les Mont-au-Prêtriers, et in nos éraient pas oubliais si chutte maudite affaire de la Police salée que les anglais voudraient nos bailli, à che qui dient, ne lus avé troublai le chervé. Qu'est quou z'en pensais don vous de chette nouvelle police? |
| Me. JEAN | An, je cré, que tout chonna est du maudit gniolin, je n'y comprends ren, mé, je n'y vé que feu; mais ou verrais que le Connétable le jouora oquo, car il est comme les vieilles pies, il a pus d'un pertus à san ni. - Mais buvais don, Me. Ph. esche quou ne trouvais par chu cidre la bon? Vos piait-i que not femme vos le caôuffe et quou il fouote une pinchie d'allspèce. |
| Me. PHILIPPE | Nennin, mercie, car i m'est avis que c'hest diex heures qui sonnent, et il est bétot temps d'allé s'annichi, si nou veur dejuqui de bouaune heure demain au matin, et être sus la coauchie a jeu ov une cherge de pommes-de terre. Chest en qui je m'en vés, car ma femme m'attend et si je sies tard à me couochi, ou m'envierra à la Nouvelle Angleterre mangi de la vacque éragie. Ainchin, à demain Me. Jean. |
| Me. JEAN | Adi mon vier garçon. |
Nov. 28 1846.
Viyiz étout: