Ch'tait not' Député qui l'i mins chonna dans la tête,
I' s'mins à l'i chanté tout l'honneur qui y'éthait,
Et tout l'bein qu'à sa paraisse i f'thait,
Tandis que man Françoies, A la plièche d'li dithe "Arrêté!"
Sé t'nait là à l'écouté,
I' finit par l'i d'mandé:
........S'i voulait bein être Chantgni.

"Françoies, la jument!" j'dis dès qué j'ouï la tchestchon,
"Eche qui n'es pon temps d'li donné du fain?"
(Car j'éthais voulu vaie l'Député bein l'yain).
Man buon homme s'drèche et dis: "Tait té s'i t'pait Jan'ton,
Tu n'as pas mal de toupé,
D'interrompre Mousieu l'Député,
Quand i' mé d'mande d'être Chantgni.

J'éthais voulu en dithe pus long, mais i'falli bein m'taithe;
Car par siez nous, ou savez, i' n'faut pas d'gnolin.
Et bein marrie, j'mé r'mins à quôtre man d'gheudrin.
Bétôt i dêhallîtes tchic chose, pour au succès du luothi bèthe;
"Allons Françoies, à ta santé,
A l'assemblée tu s'sas proposé,
Comme Candidat pour Chantgni."

Vèthe d'jà, ch'tait d'même qui fidre lus accord;
Quand i didre "Bon soièr," i' pathaissaient bein fiers,
Car à la préchaine élection; "Les luothiers
Taient seux," disaient-i, "d'mettre les rosiers dehors."
Bein p'tit man buoun homme savait
Tout l'embarras qu'il éthait,
Dévant qu'être Chantgni.

La nouvelle quothit bein vite tout l'tou d'la paraisse,
Et tuos les sièrs tchitchuns il arrivait
Qu'avaient envie d'savé si chèque ch'tait vrai.
Françoies faisait d'san mus, pour lus donné d'la graisse
En formé d'verres cauds;
Qu'étaient tous l'vés bein hauts
A la santé du prétendu Chantgni.

Il acati une vaque au buon homme Jean Piné,
Il en pêyi bein chi; mais il 'tait seux d'sa voie;
La bête fut r'vendue buon marchi à Frédéric Dé Faie,
Qu'a deux fils et chinq n'veurs en âge de voté.
Une pathe de bottes i fut qu'mandé
Pour la voix du Cordonn'yi avé.
Quand veindrait l'temps d'être Chantgni.

Pour une pathe dé braies ch'r'fut la même chose,
Il en fit faithe une pathe, dé bein laid bâzin,
(Qui n'a pu duthé) siez le jeune Mess Grandin.
Mais, hélas! il avait roubliyé qu'il 'tait tout-à-fait Rose,
Françoies eut biau tormenté,
Janmais Grandin n'voulut voté
Pour qu'un Luothi fusse Chantgni.

J'avions une raide belle géniche, mais oun'fut pas au "show":
Ch'tait la pus belle de la paraisse, sans contredit;
Et pour ne faithe pas tort à "j'm'ais pas dithe tchi."
Tout chu jour là, la g'niche resti dans not' grand clios.
I'n'yen 'tait pas d'rein du prix,
Il aimait mus une voie d'gann'yie;
Car i VOULAIT être Chantgni.

Deux-treis Sam'dis d'vant l'élection, tout l'tou d'la fèthe
Ch'tait: "Hello, vier garçon, vé-t'en par ichin,
A la RED LION, j'allons bèthe un lermin;"
Et pis quand veindra l'temps, la voix dit: "Et bein, vèthe"...
L's'auberges peuvent en profité,
Quand l'candidat veur convié;
Ayant buonne envie d'être Chantgni.

A la fin la s'maine de l'élection arrivi en sen temps;
Jé n'men vais pas en palé, car j'manimethais trop
En pensant ès n'yis sans r'pos, quand Françoies comme un fo
Me rêviyait à toute heuthe, à tchique voix rêvachant.
I'passait l'jour à quorre la pâraisse,
Nièt et jour ch'tait l'êlection sans cesse.
Avait-t'i envie d'être Chantgni!

Il y vins à la fin à chu poste, au dépièd des Rosiers;
Ach't'euthe i'settle les disputes et enforche les loies;
J'm'accuotume à oui "L'Chantgni est'i là si'ou plaît?"
Et dans la famille j'sommes à ch't'euthe tous bein fiers
D'avé un homme qui faiche san d'vé.
I'm semble à ch't'eu qu'il avait droit
D'voulé être Chantgni.