Les Pages Jèrriaises

A l'Éditeu de la Cronique


Je voudrais bain, Moussieu l'Editeu, qu'ou m'disietes si j'envisage les choses comme y daive être envisagis, au sujet de la politique de Jerry. Tout l'temps passet j'avons hieut deux partis en Jerry, que nou applait la Rose et le Loisit, que la Cronique était l'orgonne du parti d'la Rose, et le Constutionnel l'orgonne du parti du Loisit. Et bain, le craisiez tous y a des gens acheteu du parti du Loisit qui craient que le Constutionnel n'est pas l'orgonne de lus parti pasqu'il est pour des Juges peyis et ieux n'y sont pas, qu'il est dirigi et souotin par les chains qui veule tou boulversé ichin, et nos mettre souos les lois angliaches, et pas hieux disent-it.

Me, j'dit que les chains qui souotienne l'orgonne, le parti, ou les chefs de chu parti la, sont touos égaut; mettais les tous dans une même balanche et ou verrais si n'sont pas trouvais touos bein ligiers. Ils ont biau dise qu'ils sont contre les taxes et les chains qui veule nos en donné, mais ils les souotienne tout d'même, p'têtre sans sen apercevé; me je dit qu'ils sont a mainqui blieus et que d'vant longtemps ceuxe la veindront blieus tout-à-fait; pour me je crai que tandi que jeson des hommes si bornets (mais c'nest que d'effans en connaissance), en douannant lus appui a chu parti la, les destructeurs levzont la tête bein haut et lus craisont bein forts.

Et bein, Moussieu l'Éditeu, dites nous si cest la la vesitet, et votre monieze de vais, vous q'tes un homme instruit et qu'ixaminais tout pour le bein des Jerriais.

L'homme qui s'fait grand, quil est ptit,
Qu'il est bornet et p'tit d'esprit,
En publiant ces quiques lignes ou s'obligais.

Un Omin d'Jerry

Chronique de Jersey 24/4/1869

 

 

Viyiz étout:

 

Les Pages Jèrriaises