Le Mouezi, St.-Jean, chu 20 Déc. 1889.
Moussieu l'Editeu, - Y ia chique temps ou z'imprimites une lettre d'Amice Le Couteur ou'est qui disait qui fallait tâchi d'trouvé un concurent à Moussieu Hocquard, mais y n'en est pon trouvai. Mardi chté l'élection à Saint-Jean, et jeûmes une diverse bordaie d'fonne: N'ou m'avait dit qui s'nallaient nos donné une gâche à la fin d'l'élection et j'avais emporté un hamper à Messe Coutts, man marchand d'patates, pour la rapporter, mais y n'me servit pon car y n'o donnîtes qu'une galette qu'nous appelle des Fairy Cakes, chétait assez car le couezin Fred qui garde un store à guano et à grène de gernième me dit qu'ou s'vendait dviers un franc les seize onches. Y n'iavait pas seulement la gache mais etou une masse de bouanne licheu à trente très degrès d'forche et man vaîsîn Jos m'dit qu'chetait là le maximum d'la forche pour la toute bouanne licheu; y y'en avait trais qu'en avaient bu un mio trop, car yun en partichuyi ils furent obllygis d'le porter dans un hernais tout touilli d'conré et d'l'cachi jusqu'à sa porte.
En finissant, Moussieu, y faut qu'j'tâche d'encouozagi nos Saint Jeannais à combattre; j'avons d'not parti un député, un chantnyi, trais membres du kumité des kmîns et un lopîn d'officiers et d'vinteniers, y nos faus accouo un Connêtablle et pis, et pis, j'pouorrons nos ècrier:
“For we are jolly good fellows,”
And no one can deny.”
En vos rmerciant Moussieu, pour avé empiêté sus vote gazette, je finithai en disant à Messe Hocquard qu'à trais ans d'ichin j'vot'tai acouo pour li et qu'jespèthe qui nos don'na du champagne à la pièche de licheu la préchène feis qu'j'vot'tons pour li.
Y faut étou qu'j'vos dise que j'avaîmes à présider après l'élection le Pasteur Esnou, un homme qui méthite une mihieu pièche que d'chantnyi, car y n'est pon comme Messe B. en ville, comme ont dit les mauvaise langues: “Too big for his boots.” Y pâle de mettre le Pasteur E. à êchuzer les grès et à laver la carosse au Député dvant s'nallé ès Êtas.
Je sis, Moussieu, votre vier ammin,
Edouard Valpy.
(Un vier Rouoge mais qu'a touenné Blyu.)
Nouvelle Chronique de Jersey 25/12/1889
Viyiz étout: