Mousieu, - En liésant la lettre sus vote Gazette de Samedi, je pensé que v'là qui vos f'sait plaisi et à notre Omin d'Jerry, de vos contè en abregi chain qui ses passè siez l'couosin Pierreà une saisè d'hivé. J'passîmes une partie de chute saisè-là à paslé des partis d'Jerry et, quand vînt un tems, la Couosine Manon qui était à ouvrer sus sa jonquaise s'mint à nos dise:
Manon. - Ne v'là betôt deux heuses qu'ous êtes à paslé des partis, et tout ce qu'ous en avais dit ne sert de rain; écoutais mé et j'vos pasl'sai comme y faut, mé.
Flip. - Et bain, Couosine, je sai que t'as d'l'esprit, j'allons écoutè et examinè tout chain qu't'as à nouos dise.
Manon. - Je n'menvais pas vous fiattè, mais j'm'envais vos dise toute la vésitet, ous-êtes touos comme un troupé d'moutons qui vont où q'nous les menne, et pis y a les chains qui sont au rât et qui n'votent pas, j'appelle ces là des buts de bois, mé, car ils n'sont pouon d'aucune utilitè à personne mais pour vouos ou travaillis contre vote peyi, contre vouos mêmes, et contre vos effans.
Flip. - Ma fé, je n'crais pouon chunna, mé; explique-nouos chunna, et oprès j'verrons.
Manon. - Le parti du Loisit a voulu vos donnè l'fouet, des juges peyis, une police peyis, vous otè l'droit d'votè dans les élections, et nouos mettre tous esclaves, s'ils avaient peu, comme des manants, mais le parti d'la Rose s'y est tréjous opposè et ont combattu pour les Jerriais comme des braves gens, et sans yeux ous esiètes le fouet ou verriètes des juges peyis acheteu, et les gens d'la police étout, et ne v'la l'parti qu'ous avè tréjous souitint, vouos.
Pierre. - Et bain, Couosin Flip, què que tu dis de chu raisonnement là, pour mé, je craî que Manon nouos dit toute la vésitè, car oul aime tant son peyis et ses chiers effans.
Flip. - Je t'disai tout d'bon que jomais j'n'avais pensè à tou chenna, mé, et j'convains q'c'est la vésitè, mais y faut que j'te dise chain qui m'arrive quand j'vote pour chu parti là, y semble que j'sis tout boulversè et qui n'y a quique chose au d'dans mé qui m'dit que je n'fais pas bain.
Pierre. - Je m'trouve de même étout, mé, Couosin Flip, et sais-tu bain que j'pense que ces chain q'nouos appelle la conscience qui nous pasle.
Manon. - Y m'semble entendre vos décendan dis après qu'ou s'rais morts: es-ce que nos ancestres étoient si bêtes qu'ils n'pouvoient poun dicerner le parti qui souitenait les droits et les privilèges du peuple; enfin, j'vos dizait en un mot, jusqu'acheteu vouos avais tait tous un tas d'begaud.
Pierre. - Y a long temps que j'srais changi de parti sinon que j'sis trejous entêté comme un âne.
Manon. - Une bête reste trejous dans son même état, mais chain qu'agrandie l'homme, c'est quand il agit par conviction et connaissance de cause, et qu'il se laisse guidè par sa raison, et non pas par son entêtement.
Flip. - J'menvais ruminé tout chunna chut niet et j'vos disai dans une autre saisè quesque je fezai à l'avenir.
Eh bain, Mousieu, depis che temps là, le Couosin Pierre et mé avons tréjous votèt pour l'parti d'la Rose et j'nos en sommes bain trouvès et bain contents d'avai changi d'parti.
En mettant ces quiques lignes sus vote gazette, vous oblig'rais
Eun qu'a changi d'parti
Pour le bain d'son pays
5/5/1869
Viyiz étout: