Les Pages Jèrriaises

L'Abdication du Roué d'Bulgarie

Ferdinand
Fiche-le-camp!
“Ferdinand l'Félon,” les Français l'appellent,
Car il est Maître ès Félonies,
Et sa condite est tout l'contraithe de belle;
Ch'est un touanne-casaque; un vilain rebelle;
Ferdinand l'ex - - de Bulgarie!
Ferdinand
Fiche-le-camp!

“King Fox,” i' l'nomment en Angliéterre,
Car i' trompe et vole et saccage!
I' jouôte ses amins à coups d'pierre
Et à ses frèthes i' fait la dgherre;
Ferdinand l'ex - - qu'a peux d'l'orage!
Ferdinand
Fiche-le-camp!

Enfin, le v'la chutte fais qu'abdique;
Ch'est la seule belle action d'sa vie!
I' n'aime pas à ouï notr'musique;
Et n'puvant pus nos joué d'sales triques,
I' s'en va; l'ex - - de Bulgarie!
Ferdinand
Fiche-le-camp!


Elie
9/10/1918


Ch'est la dreine poésie par Elie publiée d'vant sa mort.
 

Viyiz étout:

 

Les Pages Jèrriaises