Moussieu l'Editeu,
Aupres que j'vos avais êcrit la s'maine pâssée y m'vint eune idée tchi m'a sauvé la vie. Je m'en vais vos raconté tchêsque y s'arrivit.
La Merrienne, pûs dêterminée qu'jamais de s'mettre sus les rangs pour Sènateur, avait parcouothu la pâraisse toute la s'maine et quand vint lundi au sé, ou m'dit qu'ou s'trouvait un mio fâillyie, et qu'ou s'en allait s'couchi.
Mé j'tais lâssé étout, car malgré mé, j'avais yeu à faithe le lavage, mais eune fais qu'ou fut à haut, j'pensit ch'est achteu ou pas du tout, et freumant la porte sans faithe de brit, me v'la hors vais not' docteu.
Je n'm'en vais pas vos dithe san nom, mais ch'est un charmant corps, épis un gâs tch'y sait sa djobbe. Y'a tchiques années quand j'souffrais dans mes bouéyiaux et tch'y pâslaient d'une opéthâtion. Y m'baillyit des drogues tchi me r'mintes sus mes pids dans p'tit d'temps et d'pis chenna j'ai yeu grand fouai en l'y.
Chen que j'l'y dit et chen t'chy m'dit, ch'n'est pas l'affaithe à personne, mais l'préchain matin, dans les onze heuthes le v'la tch'arrive siez-nous. La Merrienne, ne sachant pas trop pourtchi qu'il tait v'nu, l'fit entré dans l'grand parleux et y'offrit eune tâsse de tais.
'Nânnîn, mércie' y dit. 'J'n'ai pas grand temps car je s'y ben embarrasé, mais je n'pouvais pas pâssé sans entré pour vos féliciter. Nou m'a dit qu'ou prenez pour Sénateur et j'vos admithe hardi. Ben seux qu'ous éthez ma vouaix.'
La Merrienne, toute ordgueilleuse, le r'mercit ben des fais, et y print san chapé comme pour fichi san camp, mais tout d'un coup il arrêtit et la r'gardit en fache.
'Extchûsez-mé, missis' y dit comme chonna 'mais y m'semblye qu'ou n'avez pon trop bouonne minne à matin. Y'a't'y tchiquechose tchi n'va pas ben?'
'Oh nânnîn,Moussieu' ou raiponnit. 'Je sis un mio lâssée, car j'en ai p't'être fait un mio trop chais drein. Mais v'la tchi s'en va s'pâssée.'
Y n'pathut pas satisfait. 'Ou savez ben, missis' y dit 'qu'ou n'êtes pas toute jeune et qu'a votre âge y faut prendre des précautions. Je crai qué qu'tandis que je sis ichîn j'dév'thais vos examiné. J'n'aime pas votre mine.'
La Merrienne, n'y t'nant pas pûs qu'chonna, mais qu'menchant à s'éffrité, fut forchie d'y consentit, et les v'la hors à haut, tandis qu'mé, dans la tchuisine j'm'èggoufais d'rithe.
'La pouôre Merrienne' je m'fit 'tu n'sait pas tchêsque y t'attend.'
Au but d'une dém'ieuthe les v'la tch'y r'descendent. La Merrienne tait bianche comme un chique, mais drièthe san dos l'docteu m'fit un clyin tchi m'disait tout.
La Merrienne n'est pûs sus les rangs, car le docteu y'avait dit que n'y'avait presque pas un ma de tchi qu'ou n'souffrait pas. Ch'tait un mithaclye qu'oulle tait en vie et seux et certain qu'ou n'en éthait pas pour longtemps s'ou pérsistait à s'mêlé dans la politique.
Et don me v'la rasseuthé, mais, le docteu y'ayant ordonné du r'pos, la Merrienne reste au liet le long des jours et ch'est mé tch'ai à la soigni. Savous ben, je n'sis pas trop seux que ch't'idée-là tait la miyeuthe après tout.
PH'LIP
9/10/1948
Viyiz étout: