N'y'a pon grand chose a faithe a l'imprim'thie anniét, que j'dis avant-hier a nos gens. S'ous êtes de m'n'avis j'ithons bassiotté.
Lonôre saute en haut d'jouée; et Laizé dit que ch'tait eunne bouonne idée - nou rapportethait des bênis pour sa canarienne.
Nos v'la don a s'èstchippé. Mé, dans eunne pathe de vielles braies a soudard que j'portais l'temps passé dans ma forge, et les femmes dans l'shabits qui mettent les jours de lavage. J'avais emprunté deux haves, trés ratieaux a lanchon, un cro a andjulle, et un ponnyi a paison. Lonore mint l'marté a tcherbon dans sa pouchette pour abattre les bênis, Laizé portait touos les souis d'pêque - mé, j'marchais l'avant coumme Pilote.
A m'zuthe que j'avanchaimes sus l'rotchi, souos l'Châté, les pêtcheurs qui s'y trouvaient s'en allaient pus lien. J'lus faisaimes peux! Ch'est-tan-tchi, j'bassiottimes a not' laizi, coumme j'voulimes, sans persounne dans l'vaizinné a nos gâté not' pêque. J'avions dêja prins trés lanchons, un p'tit cabot (qu'Lonore mint dans sa pouchette, d'craint de l'Inspecteu) et j'en 'tais a digotté eunne houle ou-ès qui m'sembliait avé oui du rèsmouage; quand, tout d'un coup, Laizé qu'etait assise de l'aut' bord du rotchi poussi un brai èffriyablye. La malheutheuse! Ou s'était accliutchie contre le rotchi, l'malheur en vouli, drét endrét l'aut' sortie d'ma houle! Ch'que j'avais entendu rèsmoué, ch'tait lyi! et je v'nais d'li passé man cro dans l'poummé d'la gambe.
Nos v'la dans un bieau pité! N'y'a qu'eunne chose a faithe, que j'dit, après qu'jeut hallé, teurtu et touisté chu cro sus touos les sens, sans poué l'èsrachi; ch'est d'résté là a té r'posé tandi qu'j'ithons vaie, Lonore et mé, si n'y'a pon tchiq' chervettes un mio pus par là. Mais, djantre dait d'té, que j'lis dit: tu'avais bin affaithe de m'prendre le seule cro qu'j'avais! Tu méthites d'n'avé pas une seule mio d'not' pêque!
Y'avait d'la chervette! J'en happimes, entre Lonore et mé, trés bouons pots; et j'en éthaimes happé oquo pus sinon qu'la mathée c'menchait a juzé. Nos v'la don que j'ramontons en d'vizant et en pâslant du bouan fricot que les p'tit mnistre f'thait siez nous, d'main au sé; quand tout d'un coup, coumme j'ramontaimes le slip eunne pensée m'prind! Djantre de djantre! que j'fit. Et ta mémée! J'l'avons ronbliée!
Ne v'la Lonore dans touos ses stats! Ma Mémée! qu'ou crie. Ma pouore vielle meutheur! Ou s'en va être niée! Et la v'la qui lève les bras en haut, et s'met a couorre coumme eunne èsrapée du bord du Châté. Mé, après avé mins ma pêque et ma have souos les soins des soudards, et avé ramonté jusqu'au Bristol cherchi eune cigare et bethe tchiq chose pour me dounné du couothage dans m'n'èspreuve, né v'la qu'je r'devale la grêve touochot'ment - a cause du gravi dans mes bottes. En r'dévalant, l'idée m'vint (avous r'mertchi coumme tchiq' fais i' vos vînt d'droles de pensées?) que si l'malheu en voulait que j'fusse veuvi, che s'ait a Croad que j'doun'ais la djob, et que nou n'dounnait pon d'cipres a ch't'heu, et pas tréjous des gants.
Tchi fichue cigare qu'i' m'avaient vendu: j'fut oblyiji d'la rallumé quat' fais en r'dévalant. Ch'est-tan-tchi, quand j'arrivi dans l'senvithons du rotchi ou-ès que j'm'attendais a r'trouvé Laizé, la mé le r'couvrait quazi. Hai! Est-tu par lo? que j'cryi par trés fais. Persounne ne m'rèspounnit. La mathée montait tout l'temps: et j'fut a la fin forchi d'm'en r'venin a terre, en m'disant qu'sans doute Croad m'allouothait du disconte si j'settlais sa bille dans l'couthant d'un mais.
J'n'ai pas d'run d'vos dithe comment ch'la s'fit; mais ch'est "all right!" N'y'etha pon d'enterrement! Je r'trouvi mes deux femmes a la maison quand j'rentri. Et en m'servant d'eunne pathe de pinchettes et d'ma brioche, je r'pathi d'hallé l'cro dans mains d'un quart d'heuthe. Mais j'la grounni hardi.
Piteur Pain
Ou hoptchinne un mio.
Morning News 1/10/1913
Viyiz étout: