|
A la fin un bouan jour arrivi, D'chla yia déjà une bouanne volée, Quand tout l'paiesson grand et p'tits Pensit qu'ils avaient bientôt souffert assez. Et toutes les peupliades de la mé S'assemblirent pour en décider. Tchi concille que ch'tîla, mes chiers, Yen avait-i d'chi paiesson, Des maquethiaux, des lieux, d's'ormers, Pliaès, vlicots, vras, lanchon, Andjhulles et brèmes, et hau et bar, Bênits, horfi, rousses et homards. Yiavait jusqu'à de p'tite cherettes Et d'humbl'yes bobbes et des cabots, Des becques-de-corbin, des chuchettes, Des crabbes, et même de p'tits manchots, I chétaient tous v'nus pour distchutter Comment à la pêque ècapper. L'heutheux pêtchaeux qu'ithait veu ch'là Tchi coup d' “all fours” qu'il éthait fait Ov ses dranets bein plièchis là Jamais n'éthait r'veu rein d'itèt! Mais nos paiessons en r'pos rêsolurent en p'tit d'temps Qu'la miyeu chose à faithe était d'fichi tous l'camp! De d'pis chu temps là nos messieux Béttaient lus lignes en vain Et quant à nos puor' viers pêtchiaeux I n'y comprennaient rein, Mais les paiessons heutheux, dans diffethent endrèts En galopant dans l'vret châtchaient lus coues de jouaix. |
Viyiz étout: