|
L'aout jeu, de bieaux solet, pour happé des paissons, S'en fure au Mont Mado, quatre ou chinq braves garçons; Mais de chonna, bouanne gens, ou navaits qua vos taire, Car ine d'mendire pon, auquns, au Commissaire, Et chest à li toute carpe, toute angulle et grado, Qui nage atout sa coux dans l'yeaux du Mont-Mado: Lus légne déhallaits, is mette à bargoueschi Dans laquelle des mare i lus fallait pêqui, Quant un Trin'tais, savant dans touous les creux de pierres, Rue sénain et sans fliot, et kemmenche la guerre, Les quarrieux, étonnaits de vais touos chest braves gens, Travaillez lourdement à cos de martieaux lents, Et les syierts détouonaits de d' sus lus devé, Ecouochés les mains d'saoutres au lieu d'capuchi l'fé. Enfin is débahisse, et comme une bête-à-sçais, Quant i nia pu d'chours s'accouotume ès pannais; Rassasiaits de r'gardé, is mette à travailli, Et qu'est qui peut comme ieux les couoniets ben tailli? Nos pêqueux occupaits, se touanne de carre en carre, I dêhalle, i renvis, et change de mare en mare, Mais bieaux qui les déhalles, et bieaux qui les r'mette, Pas un paisson ne veur ni lus ain, ni lus bettes. Mais chene tai pas tout fait, i s'apprêtait pour yeux Du fanne qui ébahi aussi ben les carrieux: Tout d'un co, un des Sieurs s'écrie chnez pon en vain, Mafé, nen vchin un bé qui veur avalé m'nain; Ergardaits le, garçons, il est à l'agavachi; Mais attendaits umpt'i, i' nos barra bieau ji: I pouorait s'écappé, faut pas l'étiboqui, Attendon un p'ti brin pour nos faire seure de li; Enfin, il paraît que chu paisson s'endort, Et qu'il est embrachi des rudes bras de la mort; Quand nous est capuchi jusquache cou s'envole, Contre des pierres si dures, la mort n'est pas ben molle; Enfin, i' prend couorage et hale hors de l'yeaux, (Oprès une longue chasse que l'gibi est biaux) "Chest par la coux mafé, mafé chest par la coux " Les quarrieurs étonnaits déhalle de lus carrières, Les uns couores en avant, et les aoutres en arrière; Arrivant à la pièche de qui sortait le cri, Aussi ben que les Messieurs, il ure ettout du ji: Le paisson quiavé tet par la coux attrapet, Etait, le crérious, un héran tout salet! I s'égouffe touos à rire, quant un des viers Renards, S'adressant ès péqueurs, i lus dit, vos regards Sont touos remplies de joie, chest vous qui lavaits prins, Mais j'ai d'la joie ettout, chest mé qui liavaits mins; Aoucun des Grands Messieux qui pêque dans nos mares N'ont jamais peut happé un paisson aussi rare: J'en srais pas étonnet, si ou les happiêtes tous, En mettant comme chonna deux brins d'set souos lus coux.
François Godfray
|