Les Pages Jèrriaises

Par la Quoue, Mafé.


De m'sellé ma juman, je vains donné mé n'ordre,
Et j'écri d'la Trin'té le seizième jour d'Octobre.

Quand j'étion à Pontac l'aut' jour à déjuné,
Je vis ben quou vouliez oquo vuos moqui d'mé,
Car quand nou m'apporti chu prétendu billet,
Je savais ma fé ben qui v'nait d'siez Matthieu l'G[eyt]
Et au lieu d'nouos pâlé de guichons et d'torchons,
Il érait deu nouos dire quique chose de ses Mârons ;
Car quand il écrivit au Mont'au-Prêtrières,
I' dati san billet, Maison des Mârongniers.
Mais i' faut quou sachiez que l'chein qu'y répondit,
L'i bailly si bieau jeu, que Matthieu s'en choquit.
P't'être avait i' sujet ; mais garçons ni hardelles
N'vont pergué pas au bois quant il ont peux des fielles.
Enfin, je vouos dirai, mes confrères Inspecteurs,
Que touos vouos badinages me font grand mal au coeur,
Car i gnian a pas yun qui m'laisse un brin tranquille,
Et si ch'la continue je n'rierai pue au drille...
Mais siffrai j'y risrai ; et dite chein quou voudraits,
Ou n'avais ma fé pas affaire à bête lassaits.
Et sumnâme je vouos dit, j'en jure et pon nen mans,
Que j'vais vouos arrangi comme Bretons font Normans.
- Mais i' faut quou sachiez, man Coronel T[ouzé],
Que ch'est continuel'ment qu'il en ont entouors mé.
Vrainment, dens ma colère, j'avais presque juret
De n'pardonné jammais à chu Diable de G[eyt],
J'n'entends pas l'ammin G....., car ch'est un bouan garçon
Qu'aime ben à badiné, mais ch'est avec raison.
Il'ya H[amon], G[odfray], et chu grand long Phlip J[ean],
Ch'tie là, quand i' sie met, oh! ch'est un vrai Satan.
V'là ti pas, i' m'appelle Souos-Ségraitaire-d'Etat,
Mais, pardingue, j'lie die qu'i n'est qu'un Corpora.
...Une matinêe, ch'êtet, oprès nout' drill finin,
Qu'je pâlais d'chu grand cor ove chu p'ti fo d'J[anvrîn],
Qui mdit, "I lya long-tems que jen nouos pâlon pon,"
Et ben j'mapréchi d'li et lie die, "Man garçon,
" Je peux ben t'asseurai que je désir'rais ben,
" De n'pâlai pu nitout à chu grant abba-ben;
" Mais, maugrait tout l'dêpiet que j'éprouve à ly faire
" I ma têt impossible d'pouvé l'faire se taire."
Les cheux qui veine oprès, ch'est P[ipon] et R[emon], .
Qui faut mette dans un plat ove le Cap'taine B[outon],
Car quand i' sagis d'mé, i' baille tréjous d'lus goule
Si manque un mo ès autres, chès-chin ben vîte lî coule.
Vrainment, ch'nan est pas d'même de N[oué] ni de M[athet]
I' n'ont pas, par ma fé, le quart tant de caquet.
- Encouore, le crérioux ben, chu diantre de J[anvrîn],
Quia fait tréjous sembliant d'être man milieur emmin,
I' s'joignit à touos l's'autres, qui m'jouirent un vilain tuo
Qu'je n'roubléré jamais, ou man nom est grand sot
Ne vlache pas, quand l'aut jour j'étion au Mont-Mado,
Pour pêqui du paisson, je mîme nouos légnes à lieau,
Et dans la grand quârière, quand la mène yeut était,
J[anvrîn] me dit, "P[ellier], écoute ove Matt. L'G[eyt]"
Je m'en fut tout d'un coup, comme de bouanne raison,
Et tandi qu'je fus hors, G[odfray] prins un paisson.
I' prindre chu paisson et il l'minrent sus ma légne,
Et pis pour m'en r'venin G[odfray] me fit le signe.
Un vier diable d'carrieux, qu'était dans lus segret,
Me dit, "Mousieu P[ellier], vout fliotton est coulet."
Je couors et prends ma légne, et je vouos l'avouoré,
Que quand j'vis chu paisson j'dis, par la quoue mafé,
Car tandis q'je men'tais allet ump'ti lien,
Il' avaient par la quoue mins chu paisson sus m'nain.
Je n'en érais jammais prins aucune connaissance,
Si vla quiavait restet ouil avait prins naissance ;
Mais nannin, pas contens de mavé jouet chu tou,
I' s'en furent en TROMPETTES le publié partout;
Et quique jour oprès chla, quant à la ville j'étais,
Le monde, pour ne pon rire, se mordait l'but des dés,
Et même j'entendis un garçon dans la rue,
Qui disait, "il a prins un paisson par la quoue. "
Eh ben, maugré tout ch'la, j'veux ben vuos pardonné.
Fûtes-vouos touos satisfaits l'aut jour de man dînai ?
J'espère don qu'oprès que j'esson touos d'accord,
Et que chessa tout comme au Régiment du Nord ;
Car i' faut quou sachiez qu'Monsieu nout Coronel,
Quand j'somme touos ensemble, fait passé la boutèle,
Et quant il a drîlli touos ses braves soudards,
Siez Me. Charles Nicolle j'y mangeon des homards.
Et pis, par-dessus chla, je bevon du porteur,
Du cidre ou de la bière, ou un verre de liqueur;
Enfin, nout Coronel nouos garde en si bouan ordre,
Que jammais parmié nous i nia aucune discorde.
Je prie donc le bouan Dieu, de coeur et d'affection,
Qu'entre les Inspecteurs il iait une telle union ;
Et au lieu d'un dîné, je vouos en don'nai deux,
Si ou voulaits enfoui chu paisson dans un creux.
Oh ! si jammais chétait l'plaisi du tout piéssant
Que ma chière femme érait un bieau petit êfant;
Pardingue je vouos don'nais ocuore un aut' dîné,
Et vouos don'nais du vin d'la milieure qualité ;
Car à mains, quoiq'je d'meure un bu dans la campagne,
Je vouos y frais ben baire deux strès sorte t'Champagne.
Enfin, oublions tout, me faut pus y r'pansé,
Et criyaits mé tréjous voutre amin, D[an] P[ellier]
Il est vrai, j'navon pus l'Coronel Le C[outeur],
Mais i' nouos a quitté pour un pus grand honneur ;
Que l'bouan Dieu le bénisse et partout le prospère,
Car i' nous a, à touos, étet bouan comme un père.
Mais vrainment j'avon ben sujet d'nouos consolé,
Quand j'avon à sa pliaiche le Coronel T[ouzé],
Qui est aussi bouan homme quiait jamais mins saulé.
Prions don, mes confrères, pour li et sa famille,
Et piesse ti ben longtemps v'nin nouos qu'mandé au drille.

Dan Pellier

 

Viyiz étout:

 

Les Pages Jèrriaises