Les Pages Jèrriaises

Quand je s'sai grand

Quand mes pathents me d'mandent chein qu' j'voudrais faithe
Pus tard quand je s'sai grand,
J'ai bein d'la peine à dithe, car je n'sais djèthe
Tch'est que s'sait l'millieu plian.

Pour un temps j'voulais hardi être soudard,
Coumme 'Douard Binet du Dou';
Mais d'pis qu' j'ai veu les grosses duthes bottes à 'Douard
Je n'tcheins pas à ch'na du tout.

J'fus pour être frégattin quand j'ouis qu'i veient
Des belles pliaiches en confort;
Mais quand l'vent soufflye dans lus larges braies
I deivent aveir freid ès g'nors.

Les siens d's Etats et tout i viagent tout plyein -
Surtout les Sénateux;
Mais m'n onclye Frainque dit qu'i faut pour y v'nin
Qu'nou s'seit bouon emblyuteux.

Marchand d'chucrins, chorchi et musicien,
J'ai ieu et tout dans l'idée;
Mais y a trejous tchiqechose, et j'creis bein qu'à la fin
Je s'sai fermi coumme mon p'pée.

 

S. J. B.

 

Viyiz étout:

 

Les Pages Jèrriaises