Les Pages Jèrriaises

Les réflexions d'eune pétite mousse


Man nom, Souky; mén âge, onze mais;
Là où'est que j'sis n' y'a pon grand paix.
Je fais des heurles, et j'route ètout,
Et je saccage un mio partout.

N' y'a pon besoin de m'prendre à bras
Ni de m'chanter tchiquechose tout bas,
Touos chuchottements n'me font que braithe -
Quand j'sai finie, j'sis seuse de m'taithe!

J'ai d's embarras; mén estoma'
Me donne tchiquefais un p'tit mio d'ma;
Et quand eune dent perche ma mâchouaithe,
Chein que j'dis n'est pas eune priéthe!

Chaque jour j'sis dans eune traie fouôrrée
Et dans d'l'ieau caude bein trop lavée;
N'y'a pas d'savon qu'a l'gout du lait -
Et man pouorre dos est trop frotté.

La grosse catte miaune, et r'lève san pé,
Quand par la coue j'peux la happer;
Et nou vait l'tchian se rédrèchi
Si j'prends ses os pour les chuchi!

Pour man dîner j'ai d'la bouoillie,
Et quand je sis bein rassasiée,
Avec pliaîsi je mets en miette
Sus le plianchais ma p'tite assiette.

Mémée, un jour, avec des teurts,
Me montrait à sa jeune belle-soeur,
Et ou s'mârrit (sauf vot' respé)
Quand j'fis pipi sus san d'vanté!

Le temps veindra, dans vingt-chinq ans,
Quand j's'sai mathiée, j'éthai d's esfants -
Je f'thai d'autre chose que d'les berchi -
Che s'sa à ieux d'lus dêpliaûtchi!

P.W. Luce
 

Viyiz étout:

 

Les Pages Jèrriaises