Ah! men doue, qu'i nos egdache
De sôlers, de braies, de fros;
Ch'est trille, et dêchire, et gavache,
I n'a bétôt rein sus l'dos;
Tout est dêja en bédache;
Et je sai que pour de mé,
Jamais j'n'ai veu tël avé.

Il us'rait le fé des reues:
V'la des braies de tout fin dra,
N'y-a pon longtemps qu'il-s-a ieues,
Il ont dêja ieu du ma;
Et ses cauches, l's-as-tu veues?
Nou veit l'jour, ma fé, l'travers:
Ah! qu'estq' ch'est que des aviers.

L'autre jeu que j'fu en ville,
J'accati un neu chapé,
Le v'lo-t-i pon en péguille!
Et pourtant ch'en 'tait un bé;
Sen bouon fro est en guenille:
Si continue dans ch't-êtat,
J'irons tous à l'hopità.

Pas même une mill' soutière
N'y pouorrait durer un an;
Du bounet à la guertiêre
Ch'nest que chique qui li pend;
Coume une âne sans bâtière,
Il ira tout fin freid nu,
Car i n'peut garder un cllu.

Un bouon calobre d'inguenne
Que sa mâraine li fit,
Ne li durit que la s'maine.
Ah! devrai, souvent j'en sis
J'vouos enchâille dans la peine;
Car je cre que pour de mé,
Jamais n'y-a ieu tel avé.