Pour lé chain qu'a l'âm' d'un poèt'
Les sujets né manqu'nt pas;
Chain qu'à d'aut's né badr' pon la têt',
L'inspir' souvent un tas.

Si les êcliers, l'ôrage, ou bain
Lé vent y-êmeuv'nt l'esprit,
Les chos's qui 'rsembl'nt qu'd'afair' dé rain
L'afect'nt hè-tou pas p'tit.

I s'agit chut' fès d'eun' pouôr' veuv'
Qui perdit, ya tchiqu' temps,
San seul souôtchain - eun' dure êpreuv'
Pour yis èt ses èsfants....

Personn' né vint les soulagi;
I landghir'nt dans l'bésoin....
Ou tracachait san corps fayi
Pour avai un miot d'pain....

Hélas! san gans, tchêqu' ch'est qué ch'tait ?....
San louage ou n'pût payi;
Car, las! man doux! tout ch'qu'ou gagnait
S'en alait en mangi....

Y-en a occuo qu'espèr'nt combatr'
Dé la ruèn' touots les r'vèrs;
Mais yis, bieau fair', bieau sé débatr', -
San sort l'enfach', bras ouèrts....

San maîtr' d'maison - un laitdur' - vain,
Didghi par l'avaric' -
I d'mand' des sous, - la veuv' n'a rain, -
I la soum' d'vant "justic'"....

La "justic'" vé qu'ou n'peut payi,
Ch'est pourtchi n'trouv' rain d'mux -
Qu'san p'tit bèrnag' sait empoygni
Et yis fiantchie à l'hus!....

L'pouôr' miot d'meubl' fut, tchiqu's jours oprès,
Siez l'vendeux aportè,
Et pour la vent' fut bétôt prêt -
Bain rangi sus l'pavé....

P'tit à p'tit l'mond' vint s'afiotchi
Pour fair' dé bieaux bardghins; -
Les lots s'vendaient à bouan marchi -
Rèqu' pour deux-trais herpins!....

Parmi l'z-articl's s'trouv'ait eun' chos',
Qu'un pâsant ermèrtchi;
Ch'tait l'BÈR.... dans tchi la mère - eun' paus' -
Avait l' z-èsfants berchi!....

La vent' sé fît asèz rond'ment
Jusqu'à chain qu'vinse chu lot -
Quand ou s'arêtit un moment:
D'l'articl' nou n'voulait miot....

Mais tchêqu'i fait qu'pèrsonn' n'voulait
Rain d'chu lot? Ch'tait, j'pens' bain,
La Minséricord' qui criyait:
"Jé crai qué l'Bèr mé vain!"....

Ch'n'est pas d'z-"ouêsiaux" d'Vicomt' qu'alaient
A chut' vouaix obéi;
Tchêqu' les ergots d'la Justic' f'raient ?...
I n'pouôraient s'enrichi!....

Coum' dé tout' la pêque i falait
En vès les fonds volé,
L'Bèr, don, dans tchi qu'lé p'tit couochait,
Ove aut' chos' s'vît sauté!

L'pâsant qui vît chut' scène amèr'
Fâyit d'paine en crévé;
I pensit vès les lerm's d'la mèr',
Et ouis san p'tchio plieuré....

Et ach't-heu v'là eun' femm' sans vie',
Ov' sa fenmil', enviè'
A la ruèn', grâce à la Justic'
Qui ya précipitè' !....

Dghieu veil' qu'les chains à tchi I-l-a
Confièt un mouoché d'bain
Aport'nt du s'cours à cheux qué v'là
Dans un âfreux bésoin....

J. D.