Les Pages Jèrriaises

LES AVIERS.

Lo-lô, lô-lô ne crie pon tant
Ne fais pon tant d'sabbat j't'en prie!
Qu'est donc qu'il a l'bénit efant? -
Là, veurs tu prendre d'la bouillie?
Ach' t'eu est-i' ben barbouilli!
Reste donc tranquille ov' ta main, -
Bon, est-tu content, p'tit vilain!
Man bedgown en est tout touoilli!

Et, ch't'avé, qu'est donc qu'i'ly enhanne!
Qu'est qui l'possèd'? Crie donc, p'tit bête! -
J'appréhend' ben qu'i'n' se vilanne,
Ch'est assez pour en perdr' la tête! -
Après ch'la que nou m' pâl' d'èfants, -
I' vaudrait mue n'avé - chent fais -
Qu'un r'pas par jeu' et vivre en paix!
Ah benheureux cheux qui sont sans!

I' faut qu'i' saient ben à d'laisi,
Les gens qui désir'nt d'en avé! -
S'i craient qu' nou-z y trouv' du pliaisi,
Je peux leux dir' qu'i s' tromp'nt, ma fé
Quand nou-z-a d's'aviers, ch'est paré!
Ni niet ni jeu, dans aucun temps,
Non n'peut êtr' seû pour deux moments
De paix ni de tranquillité! -

Car ch'est tréjous pleurer ou rire,
Piailli' ou bouder sans raison,
Dèpich', trébuque, ou ben dèchire!
Ou galopp' par tout' la maison!
S'i' sont tranquill's, ch'est pière ocquo!
Cess'nt' i' un minut' de bouogi,
Alors ou pouvez ben gagi
Qu'i' pass'nt leux temps à faire quiqu' dro!

Quand i'n' peuv'nt mue i' s'rouoll'nt dans l'aire!
Il' us'raient jusqu'au fé des reues!
Je défie qui qu'ché sait de faire
Un' goutt' de bouon sang avec ieux!
Car j'ai r'marqui que ch'est assez
Qu'il y'ait de quiqu' bord du dangi,
Pour, comme exprès pour vos vengi.
Qu'il' aill'nt ben vite y pôqui l'nez!

Pour en parer, ch' est d'la minsère! -
- Et j'avons, nous, tout à souffri!
Car ch'est comm' rein d'en êtr' le père! -
Ah! si j'avais à r'commenchi!
Mais ch't'èfant-chin est un satan! -
- Ah! v'là qu'i c'mmenche à s'apaisi! -
- La! là! sais bouon, man p'tit chéri!
- Allons, fais ma à ta maman!

Laelius.

 

Viyiz étout:

 

Les Pages Jèrriaises