Pepée li, tchiquefais m'encouothage
A m'mettre fermi, mais j'n'y tchains pas;
J'n'ai pas d'goût pour le labouothage
Je crai qu' ch'est d'bain trop fort travas,
Et pis chein qu'j' trouve qu'est bain à craindre,
I n'y a pon grand'chose à y faithe;
Nou ouai touos les fermiers lus pliaindre
Que châque année ch'est d'piéthe en piéthe.

M'n onclye Ph'lippe, qu'est tcherpentchi,
Dit qu'n'y a pas comme une vocation,
I' voudrait m'prendre comme s'n apprenti,
Et dit qu'j'n'ai qu'faithe d'autre êducation.
Mais dame! Ch'n'est pas là chein qu'i' m'faut,
Je n'voudrais pas être rencontré
Avec un pagâs sus man dos,
Et man dîner dans un mouotchèt!

"Si ch'tait l'mein," dit ma tante Mêrienne,
"J'l'encouotha'geais à navidgi;
A vingt ans, m'n houmme était Capitaine,
Et à quarante i' se r'tithi."
Mais Memmée dit, "Jamais d'la vie!
J'ai tréjous oui qu'ch'est une vie d'tchan,
Et i m'faut aut'e chose pour man Fils
Qu' du lard salé et du héthan!"

Ch'a tréjous 'té m'n ambition,
De m'rangi parmi les messieux,
I' faut pour ch'la avec d'l'apliomb,
De s'n appathence être ordgilleux,
De belles manièthes j'en ai assez,
Dieu merci, ch'n'est pas ch'la qui manque,
Et ma carrière est toute tracée
J' m'en vais être clerque dans une banque!

G. W. de C.