|
Quand j'ai 'té jouer auv' mes anmins, Et que j'r'arrive siez nous, J'sai bein tch'est qu' Mémée s'en va m'dithe Car ou m'le dit tréjous ; “As-tu 'té bouan, coumme j't'avais dit, T'es-tu bein comporté ?” J'sai tréjous bein à tchi m'attendre Quand j'm'en vais r'arriver! Si j'vais siez Manman pour le jour, Quand j'rentre siez nous l'sé, Les preunmiéthes patholes à Mémée:- “As-tu 'té bouan aniet?” Si j'vais en ville, ou sus la grève, N'import' iou qu'j'vais m'prom'ner - Ch'est la même chose, “As-tu 'té bouan, J'voudrais saver, dis-mé?” J'en sis enn'yé, mon doue d'la vie! Crait-alle que j'sis mêchant ? Et, si j'fais tchique pétit minché, Tch'est qu'y'éthait d'ravissant ? Mais j'aim'thais bein ouï tchiqu'aut' chose Quand j'entre dans la maîson - Ch'n'est pas là eune tchestchion d'mander, A mé, un grand garçon ! Vèrsion modèrnîsée: Quand j'ai 'té jouer auve mes anmîns, Et qué j'r'arrive siez nous, J'sai bein tch'est qu'Mémée s'en va m'dithe Car ou m'lé dit tréjous; As-tu 'té bouôn, coumme j't'avais dit, T'es-tu bein comporté? J'sai tréjous bein à tchi m'attendre Quand j'm'en vais r'arriver! Si j'vais siez Manman pour lé jour, Quand j'rentre siez nous l'sé, Les preunmiéthes patholes à Mémée:- As-tu 'té bouôn aniet? Si j'vais en ville, ou sus la grève, N'împorte iou qu'j'vais m'prom'ner - Ch'est la même chose, As-tu 'té bouôn, J'voudrais saver, di-mé? J'en sis enn'yé, mon doue d'la vie! Crait-alle qué j'sis mêchant? Et, si j'fais tchique pétit mînché, Tch'est qu'y'éthait d'ravissant? Mais j'aim'thais bein ouï tchique aut' chose Quand j'entre dans la maîson - Ch'n'est pas là eune tchestchion d'mander, À mé, un grand garçon! |
Viyiz étout: