I.

Tout est fini. La vallée de la mort
Là v'là passée. Le souffrant ach'teur' dort.
Pus d'cris, ni r'gards, ni termes d'agonie!
N'ya pas à souffri' iou n' yia pus la vie.
O, Gieu merci!
Tout est fini.

II.

Tout est fini. Les rêv's que l'amour eut
Sont touos détruits. Mais, qui?.... Chès rêv's euss'nt pu
Condire à ma'... Pein' pour nous et pour li!
Or, tout c'qui est, est bein, le Sage a dit.
Donc, Gieu merci!
Tout est fini.

III.

Tout est fini. A li sont épaignis
Les grands combats, les minsèr's de chutt' vie.
Et, ô surtout! la quiestion: " Mus valu
"N'eut i' pas que je n'euss' jamais vécu?"
Aquôr',-Merci!
Tout est fini.

IV.

Tout est fini? - Mais, non! - Chôs' qu'est crée
N'périt jamais. Ou' peut êtr' transformée -
Mais cessi d'êtr'? Jamais! - Mort, donc tu vis!-
O men éfant, - Tu n'nos as qu' dévanchis!
Mon Gieu! - Merci!
Rein n'est fini.

V.

O mill' fais nan: - Rein n'est fini! L'tombé
N'est que le c'min, grand Gieu, qui mène à Té!
S'menchis je somm's ichin, - v'la tout. - Che n'est
Que quand nou' meurt qu'à vie réell' nou' naît!
Seigneur, Seigneur - Merci!
Je vé: TOUT VA Q'MENCHI!

L.