A tig de corps, criyis des brais,
Et vos poumons un miot forchis;
D'un but à l'autr' partout cuorrais,
Et dites la nouvell' que j'envie.
Dans vot' cherriot, à pi à ch'va,
Allaiz ben vit' sans perdr' de temps;
Et dites ès gens, par chin, par là,
Qu'chest un garçon, chutt' buonn' fais là.

Ne mangie pas un' seul' buochie!
Ne restaiz pas à prendr' hallaine!
Dêpêchous-vit' je vos en prie
Et n'siyis pons fids de vot peine.
Que la nouvelle sait rêpandue,
Et qu'ou sait par le monde connue;
Et dites ès gens, par chin, par là,
Qu'chest un garçon, chutt' buonn' fais là.

Par les grands k'mins, au coin des rues,
Dites-le à tous et faites d'vot mûs;
Et s'ou viyis chique fill' chi pieurre,
Pour un galant qu'ou peut avait,
Dites-li ben vit y'ou qu'je demeure,
Car oull l'éra, s'oull prend ach'teurre.
Mais dites ès gens, par chin, par là,
Qu'chest un garçon, chutt' buonn' fais là.

S'ou rencontrais chiq' vier garçon
Chi n'a ocquo peut faith s'sen choies,
Rasseûrrais-le de chutt' faishon: -
Qu'unn bell' hardell' la préchaine fais
Sa seurr' des v'nin, et qu'il l'étha,
Si veut la prendre dès qu'ou vaindra.
Mais dites ès gens, par chin, par là,
Qu'chest un garçon, chutt' buonn' fais là.

Chutt' brav' et buonn' "vieill' tante à mai,"
Chi ouvr' sa cauche près d'la jonchièthe;
N'là manchis pas! dites-li que j'ai
Voulu qu'oull' suss" y'un des premièthes;
Et à M'ait' Jean - li chi cliopenn'
Et march' à l'aid' de s'en bâton,
Dites-li duoch'ment! - d'peux qu'irr' chopenne
A la nouvel' de chu garçon.
Mais dites ès gens, par chin, par là,
Qu'chest un garçon, chutt' buonn' fais là.

J.C.L.T.
1873

Chronique de Jersey 28/6/1873