Les Pages Jèrriaises

La Décision


J'voudrais bein saver tch'est qu'j'peux faithe
Pour pliaithe à mes pathents ;
Pépée n'fait que d'rouâblier sus mé
Et Mémée grounds tout l'temps;
J'sis lus seule fille, et faut que j'reste
En travas sus la ferme
Quand j'éthai finni m'n êcolage
A la fin de chu terme.

Mais j'n'en veurs rein, d'chu sale travas
Dans l's êtabl'yes et les clios
À plianter patates, soigni vaques,
Dans la terre et la baue ;
à porter la bouochie ès hoummes
Matin et arlevée,
Et dans l'solyi être à mâter
Séthée auprès séthée.

Je m'pliaîthais mus dans tchique office
À chiffrer et êcrithe,
Ou dans eune banque parmi les sou,
Mais Pépée n'fait qu' d'en rithe!
“Gardes-tes mains nettes, s'tu peux, ma fille,
Mais r'gardes les meinnes ", i' dit,
Et n'oublyies pon qu'les sou qu'j'ramasse
Valent les siens d'un bantchi!"

Il est tellement à la vielle mode
Et n'veurt pon m'êcouter,
Ni vaie qu'y'a d'aut' choses pour les filles
Que bottes et gros d'vanté ;
Des hauts talons? Des robes en souaie ?
Mon doue, ch'est là qu'i' c'menche!
“Nou n'met pon d'ité en travas -
Ch'est d's habits du dinmanche !”

Tchi faithe? Secours, tout n'est pas bein!
I' s'fie qu'j'm'en vais céder;
Si j'ai ma tête, i' n'y'a pas d'doute
Que j'lî f'thai mal au tchoeu;
J'avais envie d'tchitter l'êcole
Et d'aver un bouan temps,
Mais coumme ne v'là les choses à ch't heu
J'voudrais n'aver qu'siex ans!

 

ALP

 

Viyiz étout:

 

Les Pages Jèrriaises