San Antonio,
Texas,
USA.
Lé 16 dé fèvri, 1980.
Moussieu l'Rédacteu,
Ch'est r'mèrquabl'ye d'vaie, dans la gâzette du six d'dézembre (j'ai r'chu les cheinnes du 6 et du 13 en même temps), tch'i' y'a acouo assez d'villais tch'ont l'amour dè nouot' vielle langue à tchoeu pour prêsérver l'bouan vièr nom Jèrriais dé La Route des Petits Camps. Pour chenna i' faut r'mèrcier Moussieu Maurice Richardson, dé La Sociétè Jèrriaise, et l'Député Philip Mouothant. Y'a tellement dé tendances dé vouler mênommer tout, même routes et contrées, auve des noms Angliais, qué v'là tchi fait pliaîsi d'vaie tchitch'un s'èrbînfrer d'même dé temps en temps. À mains qué tchitch'un faiche un r'cord des vièrs noms, i' s'en vont dispathaître bein vite. Av'ous janmais pensé combein tch'i' y'a d'Jèrriais au jour d'aniet tchi peuvent donner les noms dè touos les rotchièrs lé tou des côtes dé Jèrri? J'n'en connais qu' iun - lé Docteu Fraînque Le Maistre, OBE. Y'a tchiques anciens par pâraisse, sans doute, tchi peuvent nommer les rotchièrs lé long d'la côte endrait lus pâraisses. Mais les nommer tout à l'entou d'l'Île est aut' affaithe, et si l'Docteu L'Maistre n'en fait pon un r'cord les noms s'sont pèrdus à tout janmais.
Eune chose tchi m'nâvre est d'liéthe, dans quâsi toutes les gâzettes, des lettres dé pèrsonnes auve des noms Angliais tchi sont tréjous à lus pliaindre tch'il' ont à payi trop pour lé louage des maîsons bâties par Les Etats. Et i' trouvent tréjous à r'dithe contre la manniéthe qué l'Île est gouvèrnée. Pourtchi tch'i' restent en Jèrri? I' n'sont pon du tout èrconnaîssants tch'il' ont eune pliaiche à d'meuther quand y'a tant d'Jèrriais tchi n'en ont pon. Mais nouos y v'là - lé vièr diton nouos dit tch'est qu' du monde dé même font quand nou lus fait du bein!
Acouo deux vièrs Jèrriais dé distînction au Paradis. Moussieu Philip James Le Brun, d'St. Ouën, au bel âge dé nénante-sept - quâsi nénante-huit - et l'Sieur John Ernest Gaudin à l'âge dé septante-six.
Moussieu L'Brun avait eune mémouaithe èrmèrquabl'ye, et ch'tait tréjous un pliaîsi d'pouver s'assiéthe auve li au pid du feu et pâler des bouans vièrs temps. Sa mémouaithe 'tait rêéllement l'portrait d'l'histouaithe politique et r'ligieuse dé St. Ouën duthant les dreins chent ans, car il avait 'té un champion du parti Louothi toute sa vie et Seurvilyant d'l'êglyise parouaîssiale pour pus d'quarante ans. Il 'tait tréjous riant, av'nant et d'bouanne heunmeu. San p'pèe, lé Coronel James Le Brun, 'tait l'Coronel dé man régiment dans la Milice Rouoyale. Né v'là don un dîngne èrprésentant d'la vielle noblièche dé Jèrri au r'pos êtèrnel - un aut' mio d'Jèrri dispathu.
Lé Sieur Ernie Gaudin 'tait un fanmeux Jèrriais étout, un moussieu d'grand' capacité. J'm'èrsouveins qué j'tais en Jèrri quand i' fut nommé président du Housing Committee dans L's Etats. Y'en avait tchi criyaient tch'il 'tait hors dé s'n êlément comme président d'un conmité, mais i' n'fûdrent pon longtemps à dêcouvri autrément! I' fît un mangnifique président, et i' n'avait pon d'peux dé s'mâter sus ses pids d'driéthe et dithe san p'tit but. Quand i' pâlait, ch'tait auve la conviction d'un vièr Jèrriais tch'est seux d'san coup. Nou-s-avait l'pliaîsi dé l'vaie au restaurant Marina à L'Eta tchiquefais au Dînmanche, et quand i' faîsait s'n entrée, auve lé souôri habituel sus sa fache et l'ambron dé s'n ênèrgie, ch'tait comme si eune pétite brîse dé vent entrait par la porte. Acouo un aut' mio d'Jèrri dispathu - et y'a si p'tit d'vièrs Jèrriais d'restant.
I' faut féliciter l'Connêtabl'ye Pithouet d'St. Ouën pour aver gângni san pointe dé hauchi l'prix d'la licence pour garder un tchian à deux louis. Tout a hauchi - pourtchi pon l'privilège dé garder un tchian? V'là tchi s'en va faithe les gens apprécier lus tchians acouo pus. Ch'est un gardgien à bouan marchi, quand nou-s-y pense. I' n'y'en est pon drein d'faithe la garde au Dînmanche pour rein - quouaiqu'un gardgien à deux pids veurt êt' payi l'doubl'ye par heuthe lé Dînmanche et aut' jours dé fête.
J'sis d'avis tchi dév'thait y'aver eune taxe sus les j'vaux étout. Le Senateu Reg Jeune a parfaitement raîson quand i' nous dit qué les j'vaux sacagent les c'mîns. Dans cèrtains c'mîns ch'est comme si la tchéthue à brîsi avait pâssé par là auprès qu' les j'vaux y'ont piétonné.
Si janmais eune pèrsonne a dit la véthité, ch'tait l'Sénateu Ouoyamme Morvan quand i' dît dans L's Etats qué l'dév'loppement d'maîsons dans la Rue Dumaresq est grotesque. Ch'est âffreux d'vaie comme la ville a 'té avraûnée souos l'estchuse du progrès!
George d'La Forge
Viyiz étout: