La gamme dé Couronne et Ancre est eune vielle gamme tch'est populaithe ès fêtes et êvènements en Jèrri et d'aut' bord. S'lon la Commission pouor la Gag'gie d'Jèrri, la gamme est eune game à dés, jouée quédane contre la banque et peut êt' offèrte pouor tcheûter des sou ou pouor un profit pèrsonnel. S'lon les règl'yes d'la gag'gie en Jèrri, nou n'peut pon aver eune gamme pèrmanente dé Couronne et Ancre; ch'est raîque pouor des êvènements coumme des courses, des sports et des fêtes, et les cheins licenciés pouor couôrre eune tabl'ye sont lînmités pouor combein d'fais par an qu'i' sont pèrmîns d'opéther eune gamme dé Couronne et Ancre, et i' daivent înformer la Commission pouor les dates et dêfinnissâles des êvènements où'est nou propose dé couôrre eune tabl'ye.
Ch'est eune gamme à gagi, jouée atout des dés spéciaux et eune natte ou tabl'ye.
Sus châque dé y'a des sŷmboles, iun par fache: couronne, ancre, tchoeu, picl'ye, carreau, trêfl'ye. Ches mêmes sŷmboles sont mèrtchis dans des cârrés sus la natte ou la tabl'ye. Ch'est d'couôteunme qu'i' y'a eune stâle pouor la gamme ès fêtes, et les gageurs veinnent jouer à la tabl'ye.
La gamme est jouée atout trais dés, pitchis dans eune coupe couvèrte dé tchui. La coupe est châtchie, auve les dés d'dans, et renvèrtchie sus la tabl'ye. Les gageurs pliaichent lus gageâles sus lé sŷmbole ou les sŷmboles qu'i' veulent gagi sus. La coupe est l'vée pouor mouontrer les dés.
Coumme tchi qu'nou gângne?
S'nou-s-a gagi sus un sŷmbole tch'appathaît sus iun des dés, nou gâgne la même somme qué nou-s-a gagi: 1:1
S'nou-s-a gagi sus un sŷmbole tch'appathaît sus deux des dés, nou gâgne deux fais la somme qué nou-s-a gagi: 2:1
S'nou-s-a gagi sus un sŷmbole tch'appathaît sus touos les trais dés, nou gâgne trais fais la somme qué nou-s-a gagi: 3:1
S'nou n'a pon cadré auve autchun des sŷmboles, nou pèrd sa gageâle.
Si, quand la coupe est l'vée, iun des dés est canté contre un aut' dé, la gamme est nulle et la coupe dait êt' èrpitchie. Mais si un dé 'tait canté contre lé bord dé la coupe et tchit quand la coupe fut l'vée, les sŷmboles gângnants sont les cheins tchi sont à haut auprès qu'lé dé (ou les dés) ont rouôlé.
L'opéthateu d'eune tabl'ye dé Couronne et Ancre dait mouontrer les règl'yes au mains en Angliais et en Portûndgais. Tchuthieûthement pouor d'la gag'gie, les mousses sont pèrmîns d'jouer si un pathent ou gardgien est présent et seurvil'ye lé mousse.
Viyiz étout: