San Antonio, Texas,
U.S.A.
Moussieu d'Rédacteu,
À ch't heu qu' la fête dé Noué est passée, les gens s'en vont s'mett' dans la tête dé faithe - ou dé n'faithe pon - tel et tel à l'av'nîn. Y'en a tchi s'en vont êprouver à tchitter à feunmer. D'aut' s'en vont lus décider dé n'faithe pon sèrvi la grosse pathole en convèrsation. Femme tchi caqu'te et poule tchi pond font du brit dans les maisons! et d's hommes s'en vont d'mander à lus femmes dé tchitter à les chicangni, et les femmes, s'en vont s'y accorder à condition qué l's hommes tchittent à baithe d'la bièthe ou à hanter l's aubèrges au sé. Enfîn, nou sait bein qu'tous n'peuvent pon êt' parfaits et tch'il en faut d'toutes les sortes pour faithe un monde. L's hommes tchi n'ont janmais prîns souain d'un mènage n'ont autcheune idée du travas qu'eune femme a à faithe à garder maison propre, graie les r'pas, laver les vaissieaux, souangni les mousses, laver et féther l'lînge, rabilyi les cauches et l's habits d'la fanmile, sans pâler d'faithe les lyits, êpousseter, etc. Et la femme tchi n'a janmais ieu autcheun souci né comprend pon la gène qu'un homme - prîncipalement un fèrmyi d'nouos jours - a au sujet d'pouver payi san c'mîn et nouorri et habilyi sa fanmile en mauvaise saison quand tout va mal, et quand l'temps mème est contre li.
En tout cas i' faut espéther qué l'accord et l'contentement s'en vont rempliaichi la discorde dans l'nouvel an. Ch'est affreux d'vaie l'nombre d'dêmathiages qué nou vait dans la gâzette dépis qu'la louai pèrmet d'ité d'êt' légalisé en Jèrri. L'affaithe s'en va dév'nîn aussi piéthe comme en Améthique si v'la tchi continnue. V'la tchi m'fait penser à un sèrmon au sujet d'la vie conjugale qué j'ouïais sus la radio à l'occasion du mathiage dé nouot' souveraine danme et Duchêsse dé Nouormandie la reine Elizabeth II, à l'Abbaye dé Westminster en Angliétèrre, quand oulle 'tait prîncêsse. Si ma mémouaithe n'est pon en d'faut, i' m'sembl'ye qué ch'tait vièrs la fîn d'mil neu' chent quarante-sept. Ch'tait l'Archêvêque dé York tchi prêchait l'sèrmon et il' tait si à propos, si solonnel et en mème temps si pliein d'bouan sens, qué jé n'l'ai janmais oublyiyé. Ch'tait tchiquechose comme chenn'chîn:-
Mettant d'côté la sîngnification nâtionnale et la grandeu dé ch't occâsion chu sèrvice dé mathiage ichîn est absolûment l'même pour lé pus pauvre des labouotheurs tchi pouorrait s'mathier dans l'églyise d'autcheun p'tit village.
Ou-s-avez fait un voeu sincèthe, et ou-s-avez fait eune promêsse soloneille en présence du Bouan Dgieu et du monde sus la tèrre, qué pour lé mus ou pour le pièthe, en santé comme en maladie, ou s'sez tréjous fidèle iun envèrs l'autre.
Ou vouos êt' donnés iun à l'autre en amour et sans offrun. Né v'la l'ségret du bonheur dans la vie mathiée. Pour êt' heutheux ensembl'yes i' faut pardessus tout aver d'la patienche et s'entr' aîdgi à tout faithe, en toutes choses, sans offrun, en pouorreté comme en richesses, sans mârrison ni arrièthe pensée, en peine comme en jouaie. Dé mème ou-s-apprendrez à vouos entr'soulagi et vouos entre supporter dans lé c'mîn d'la vie en marchant ensembl'yes auve amiêtchi et éspéthance.
Et acouo chu sèrvice ichin n'est pon seulement eune affaithe dé promêsses solonnelles: Ch'est un sèrvice dé bénédiction! Ch'n'est qu'auve l'aide du Bouan Dgieu que nou peut garder des promêsses. Sa bénédiction vouos à 'té donnée pour vouos aîdgi à vivre ensembl'yes sus chutte tèrre dé telle manièthe qu'à la fîn d'vouos jours ou' pouorrez méthiter la vie êtèrnelle. Lé Seigneur est ichîn pour vouos béni et I' s'sa tréjous auve vous pour vous aîdgi et vouos montrer lé c'mîn. S'n amour approfonditha la vôtre, et l'pus qu'ou' pouorrez vouos appréchi d'Li, lé pus près ou' s'sez l'iun d'l'autre!
Si touos les coupl'yes pranaient l'avis donné par l'Archêvêque dans san sèrmon, i' n'y éthait janmais d'disputes tchi n'pouorraient pon êt' arrangies à l'amiabl'ye, comme dîsent les êcrivains, et la dispute n'éthait pon bésouain d'condithe au dêmathiage!
Ch'n'est pon seulement l'affaithe dé dêmathiage tchi fait l'ma: Ch'est les pouorres mousses des dêmathiés tch'en souffrent l'pus. Quand les pathents s'pathés légalement sé r'mathyissent, les mousses de iun ou d'l'autre né sont pon souvent heutheux auve les nouvieaux d'mié-pèthe ou d'mié-mèthe. Ichîn, en Améthique, j'avons des cours spéciales - appelées Juvenile Courts en Angliais - pour êprouver à corrigi les malfaiteurs tch'ont mains d'dgiex-huit ou vîngt ans sans les condamner à peine dé prison, et la majorité des jannes tchi sont présentés sont êfants d'pathents dêmathiés!
I' faut avouer qu'les temps et les moeurs ont changi. Dé nouos jours, la vie est p't êt' dév'nue trop aîsie pour la majorité des gens. L's heuthes dé travas ont moli et les gages ont hauchi, et un tas des jannes gangnent lus vie si aîsiement tch'i' n'savent pon tchi faithe pour sé passer l'temps et i' n'pensent qu'à faithe mînchet. Y'avait pus d'méthite dans la vie quand fallait travailli dû et d'longues heuthes pour gangni san pain!
George d'La Forge
Viyiz étout: