Fort Lauderdale,
Florida,
USA.
Lé 5 dé janvyi, 1980.
Moussieu l'Rédacteu,
À ch't heu qué j'sommes dans l'nouvel an, nou donn'nait tchiquechose pour saver tch'est tchi nouos pend sus la tête duthant les préchaines années. Et acouo, nou-s-est p't-êt' mus dé n'lé saver pon. Ieune des choses qué j'voudrais vaie est un amendement dans l'sèrvice des Postes. J'ai r'chu trais gâzettes dé Jèrri à ches drein - les cheinnes du preunmyi et du tchînze dé novembre preunmiéthement, et pis la cheinne du huit quat' jours pus tard. Enfîn, i' faut quand-même admettre qué ch'est un vraie pliaîsi d'les r'chéver, tôt ou tard, et d'vaie tch'est tchi s'pâsse dans lé p'tit pays natal.
Nou-s-aime tréjous vaie les portraits d'gens qu' nou connaît dans les gâzettes, et en ouvrant la cheinne du preunmyi d'novembre j'ai ieu l'pliaîsi d'vaie l'portrait d'mes vaîthîns Henri et Jane Dgilleaume dé Little Farm, tout près d'man vièr Ménage à St. Ouën. Un bieau portrait d'touos les deux, ouaithe tch'i' n'pathaîssent pon vièrs assez pour aver 'té mathiés chînquante ans! Et j'prends ch't' occâsion pour ajouôter mes complyîments et félicitâtions ès cheins d'la gâzette pour lus neuches d'or. Nou n'pouôrrait janmais trouver d'miyeu vaîthîns, tréjous av'nants et d'bouanne heunmeur et tréjous prêts à donner un coup d'main au bésoin. Et l'sèrvice à l'Eglyise dé St. George au Dînmanche matîn trouve tréjous Madanme Jane Dgilleaume, auve san bieau souôri, assise dans san banc auve ses anmîns.
En liêsant les gâzettes, nou vait qué l's affaithes en Jèrri n'ont pon changi fort duthant les dgiex ans tchi veinnent dé s'pâsser. J'tais amûsé d'vaie, par exempl'ye, dans la cheinne du preunmyi d'novembre qué la police a avèrti l'peupl'ye qué les motoristes cachent trop vite et tch'i' siévent lé moto l'avant à ieux d'trop près. Y'a trente ans qué j'sis à lus dithe la même chose! Mais i' y'a p't-êt' espéthance. J'vai qué L's Etats sont en trains d'considéther un projet d'louai pour peunni pus sévéthement les motoristes tchi causent la mort d'eune pèrsonne en cachant d'eune manniéthe irresponsabl'ye. J'mé d'mande même si la prison pour chînq ans est peunnition suffisante. À m'n idée, ché s'sait p't-êt' mus d'empêchi l'atchûsé dans un cas d'même dé cachi ou d'posséder un moto duthant l'reste d'ses jours pûtôt d'aver à l'maint'nîn en prison pour chînq ans.
Ieune des drôles dé nouvelles dans la gâzette du tchînze dé novembre est la collision dans La Rue d'Val Plaisant entre eune cârrosse à j'va et un moto. Né v'là d'tchi qué nou n'vait pon souvent ches jours. La prîncipale chose dans chu cas-là est qu' les deux garçons dans la cârrosse en êcapîdrent sans trop d'avârie, et que l'pouôrre chéva n'eut pon d'ma. Dépis qué j'vis tant dé j'vaux tués, bliessés et estropiés à la dgèrre dé 1914, j'ai tréjous ieu pitchi d'en vaie iun bliessé, car v'là tchi veurt souvent dithe tch'i' faut l'ag'ver.
Eune chose tchi n'pathaît pon amender en Jèrri est la mauvaîtchi d'un tas d'jannes malfaiteurs. Quand nou pense qué, d'nous jours tchi sont supposés êt' êcliaithis par tant d'êducation, eune dgaîngue dé jannes hommes peuvent assaûter un policeman et l'codpîser au point tch'i' pèrd connaîssance quandy tch'il est bas, ch'est absolûment însupportabl'ye, et l's années d'prison prononcées par la Cour Rouoyale né m'pathaîssent même pon suffisantes comme peunnition pour pathel crînme. Né v'là un cas ou'est qué l'fouet dévthait êt' fait sèrvi. Nou créthait qué l's autorités d'veindraient endueurchis ches jours qué l'crînme pathaît en gângni partout l'monde, mais nou-fait. Et j'vai qu' la prison en Jèrri est dêjà considéthee trop p'tite et ouaithe tch'i' continnuent à avèrti l'peupl'ye qué la mauvaîtchi n's'en va pon êt' tolie à l'av'nîn, l'affaithe pathaît empiéthi à la pliaiche d'amender. Espéthons qué la Nouvelle Année s'en va nouos apporter l'amendement tant espéthé.
J'tais content d'vaie tch'i' font acouo du nièr beurre en Jèrri. En ouvrant la gâzette, j'pensais vaie l'portrait d'un tas d'mes anmîns d'L'Assembliée d'Jèrriais à rêmuer l'bachîn, mais j'ai veu qué ch'tait les jannes fermièrs tch'étaient les héros. I' faut les féliciter. J'voudrais aveu peu joui dé la séthée auve ieux et gouôté l'fanmeux nièr beurre!
George d'La Forge
Viyiz étout: