San Antonio,Texas, U.S.A.
Lé 5 dé dézembre, 1981.
Moussieu l'Rédacteu,
Non n'sait janmais tch'est tchi vouos pend sus la tête, nouos dit un vièr diton. Et ch'est eune fichue bouanne chose, car si l's êvènements à v'nîn 'taient connus d'avanche l's avâries s'saient doubliément pénibl'yes en l's attendant. Ch'est vrai qu' eune avârie n'est pon d'sithabl'ye, même quand oulle arrive innattenduement, mais au mains nou peut s'donner l'couothage dé la supporter.
V'là tchi m'ramémouaithe un bieau jour quand j'tais mousse à l'Êcole Wesleyenne au Haut du Mathais à St. Ouën. Dans l'mitan d'l'arlévée, le maître, Moussieu Harry James Carter, dêcliathit, au grand pliaîsi d'touos nous, qué j'allions sorti d'bouanne heuthe viyant tch'i' voulait faithe honneu à trais des garçons d'la classe des grands ("Standard 7") tchi s'en allaient tchitter l'êcole pour lus en aller à La Côte pour les Robîns, ayant pâssé l'examen.
Les trais 'taient Francis Hâcou, Bert Anmîn et un nommé Malzard. J'ai oubliyé san preunmié nom et ch'n'est pon ravissant car j'sis à vouos raconter d'tchi tchi s'arrivit en 1902 ou 1903, y'a don quâsi huiptante ans. Eh bein, lé maître nouos rassemblyit touos ensembl'ye, les classes deux à sept, et d'mandit ès trais candidats pour La Côte dé lus l'ver d'but à lus pliaiche à la tête dé lus classe. Pis i' nouos dît tchi bouans garçons tch'il' avaient 'té touos l's ans à l'êcole et comment tch'i' s'étaient bein comportés et avaient monté d'classe en classe sans aver d'mauvaises mèrques pour lus leçons ou comports. Et lus rêcompense les attendait. Eune vie întérêssante et aventuthiéthe allait c'menchi par lus présence à bord d'un navithe tchi les portéthait sus la grand' mé à La Côte où'est tch'il' taient seux d'continnuer lus bouân comport et prendre avantage dé lus bouanne êducâtion et dév'nîn des grosses têtes dans l'conmèrce des Robîns. Iun d'ieux pouôrrait même dév'nîn Gouvèrneux d'Gaspé comme un Jèrriais distîndgi, Françouais L'Maistre, avait 'té y'a bein d's années. Et i' fut Lieut'nant Gouvèrneux d'Tchubec dé 1793 jusqu'à sa mort en 1805.
I' m'sembl'ye qué j'les vai acouo, mâtés d'but driéthe lus ecritouaithes, souôriants et plieins d'vie, trais bieaux garçons grands et bein pliantés pour lus âges dé treize ou quatorze ans tch'était l'âge dé tchitter l'êcole dans chu temps-là.
I' lus en fûdrent à bord d'un navithe à vailes, probabliément dans iun tch'appartenait ès Robîns. I' faut penser que l'viage fut pliaîsant pour les trais bouans camarades tchi viyaient eune vie aventuthiéthe l'avant à ieux, mais comme nouos l'dit l'vièr diton: "Nou n'sait janmais tch'est tchi vouos pend sus la tête." Arrivés dans l'navithe sains et saufs en rade à Paspédgia, Francis Hâcou, tréjous prêt à aîdgi à l'êtchipe du navithe, env'yit un boutchet hors-bord au but d'un filin pour ramonter d'l'ieau d'me sus l'pont, pèrdit sa balanche et tchit hors-bord li-même et fut nyié.
J'm'èrsouveins qu' tout St.Ouën fut attristé par la nouvelle, car Francis Hâcou 'tait bein aimé. Il 'tait l'fréthe du défunt Reginald Hâcou tch'était l'officyi d'la pâraisse pour vaie qu' les mousses allîssent à l'êcole ("School Attendante Officer") tchi mouothit à l'âge dé huiptante ans en 1977. Lé janne Fraînque tchi fut nyié à Paspédgia èrsembliait à lus soeu Ada (tchi mouothit en 1974 à l'âge dé huiptante-quatre) comme deux d'goûts dg'ieau.
Pus tard, j'crai qué ch'tait en 1908, deux aut' garçons tch'étaient à l'Êcole Wesleyenne auve mé, Joseph Le Floch et John Le Heron, lus en fûdrent à La Côte étout. John Le Heron mouothit à Montréal en 1970. Comme j'vouos l'disais dans ma lettre du 27 dé juîn, 1981, Joseph Le Floch, acouo pliein d'vie à nénant'tch'un ans, d'meuthe à Montréal auprès aver pâssé la grand' partie d'sa longue vie pour les Robîns dans divèrses régions d'La Côte. I' mathyit eune charmante fille, Mdlle. Florence Bisson, née d'pathents Jèrriais à La Côte, et il' ont êl'vé eune mangnifique fanmil'ye dé trais garçons et trais filles.
Nou peut dithe qué ch'n'est pon tréjous l'avârie tchi vouos pend sus la tête. Heutheusement, ch'est souvent la bouanne chance étout. Et quand j'tais à l'Êcole Wesleyenne à St. Ouën, i' n'mé sembliait pon qu' la rude disciplinne dé Moussieu Carter 'tait trop sévéthe. I' fallait s'attendre à êt' peunnis pour la mauvaise condite et l'manque d'attention ès leçons. Un tas des jannes d'à ch't heu ont grand bésoin d'chutte disciplinne-là!
George d'La Forge
Viyiz étout: