Les Pages Jèrriaises

Mes Jannes Jours

 

I'y'a eune fais dans la vie quand nou réalise qué nou n'a pon 'couo les talons jaunes. Pouor mé, ch'là s'pâssit y'a tchiques sémaines quand j'tais dans eune salle d'clâsse.

J'tions à distchuter les noms d'pliaiche dans l' Ouêst dé l'île, et viyant qu'ch'tait à l'êcole du même nom, j'pâlînmes dé l'originne du mot "tchennevais". Iun d'mes êtudgiants, Andrew, mé d'mandit si les clios là 'taient faits sèrvi pouor garder l'monde "haut" mais j'li dit qué ch'tait pustôt pouor y craître lé han tchi 'tait nécessaithe pouor faithe des cordes pouor les navithes tchi 'taient bâtis à Gouôrray, lé Hâvre des Pas ou sus la grève entre la Ville et St. Aubîn.

J'lî dit étout qué ma preunmiéthe êcole n'tait pon liain d'ilo, viyant qu'i' s'trouvait sus la Rue du Pont Marquet. Ch'tait eune p'tite êcole tchi 'tait gardée par eune Missis Benson, auve eune douzaine d'êfants dé quatre à siêx ans. Touos mes anmîns v'naient à l'êcole d'la pâraîsse et j'voudrais y v'nîn étout, mais à quatre ans nou n'a pon d'chouaix.

Dans chu temps-là, i' n'y'avait pon trop d'maîsons entre lé Pont Marquet et l'Aéroport. Nou n'viyait rein qu'l'Stand d'la course ès j'vaux à Don Bridge et les mielles. I' n'y avait pon d'boutiques par-là nitout, excepté les R.M. Stores ès Rouoges Maîsons ; au nord, rein qu' du sablion, dé l'hèrbe et tchiques bouais et pis l'Aéroport, auve les vièrs hangars bâtis par l's Allemands.

Andrew mé d'mandit quand tchi qué ch'tait d'même, et ch'tait quand j'disais, « D'vièrs 1953 ou '54 » qué j'réalisit qué ch'tait y'a la maîntchi d'un siècl'ye ! Tchi grand changement !


Tony Scott Warren
2003
 

Viyiz étout:

 

Les Pages Jèrriaises