À Portinfé, Saint Ou
Jeudi au sé.
Moussieu l'Editeu,
J'ai dit bein des fais que les temps sont changis, et à ch'teu nou n'peut pas s'en douter. Nou-s-avait tréjous comprint qu'après trais blianches gelées nou-s-éthait d'la plyie. Et bein, pour chinq jours de siete tout a 'té blianc par ichin et par chein qu'nou-s-entend, dans toutes les autres parties de l'Ile étout. Heutheusement, je n'souffrons par d'la fraid dans notre tchuisine car la Merrienne s'en va dans l'hangar touos les matins pour scier assez d'bouais pour lé jour. Ch'n'est pas d'agniet Moussieu, que j'ai seu que ma bouonnefemme a d'la forche dans ses bras!
Comme je m'y'attendais, lé Chantgni Vautchi a 'té chouaisi à la Trin'té pour Député et chonna sans oppôsition. Nou n'sait pas tchèsqu'i' s'en va faithe dans l's Etats mais nou peut être bein seux tch'i' restétha pas silencieux, car ch'n'est pas l'habitude des Vautchièrs. Il a promint tch'i'vot'tait tréjous contre le gaspillement des souos du publyic et nou peut s'fier tch'i' tcheindra à sa pathole.
Les grandes tchestchions au moment ch'est la tchestchion des louogements pour les pouóres gens et la tchestchion des neuves écoles que l'John Lé Mèrquand voudrait báti. Quant ès louogements, i' y'en a tchi voudraient vaie les gens qu'ont tout-plien d'sous en dégorgi assez pour aidgi ès pauvres, et j'espèthe que nou les vérra l'faithe mais nou n'peut pas oublier que les richards ont l'habitude de t'nin à lûs sous comme un béni sûs un rotchi. Entre nous, Moussieu, et pour être compliètement franc, j'n'en crais pas grand'chose de chu projet-là.
A ch'teu' pour les êcoles. Ichin la 'Post' n'a pas mantchi lé Sénateur John Lé Mèrquand, en disant tchi faut que touos l's êfans aient une bouonne êducâtion, mais qu'une êcole ne dév'thait pas être un palais. Lé John a tréjous fait comme il a voulu jusqu'ichin et dans l's Etats i' n'a jamais rencontré autchune opposition. La 'Post' dit tch'il est grand temps de crier halte au immense couôtage et que chais ultra-modernes êcoles peuvent faithe pûs d'ma que d'bein ès mousses tchi veinnent des familles tchi n'peuvent pas garder lûs minséthablyes louogements en autchun êtat de r'pathâtion et ont bein d'la peine à vivre. Les neuves écoles que l'Sénateur envisage ne sont pas ocquo baties!
En mentionnant les sujets d'importance, Moussieu j'oubliais pour le moment le célèbre boeu au John Le Ruez, tch'il a vendu au r'présentant d'la Reine et tchi part pour sa nouvelle destination par chein qu'j'en comprends la s'maine tchi veint. Jamais dans toute la vie du Herd Book a un boeu 'tait visité par des gens si distinguis comme ch't ichin. Lé Gouverneux a 'té l'vaie et d'autres grandes gens. Nou pâsle même de l'ex-Bailli Coutanche et du présent Bailli et bein d'autres. Etant tchuthieux d'ma sorte j'fus l'vaie hier et chein que j'peux dithe du John ch'est tch'il a l'miyeu suit d'bêtes dans ses etablyes que j'ai jamais veu dans l'couothant d'ma vie. Ses etablyes sont plienes et l' n'y'a pas un coin pour un autre anima. S'i' s'décidait de vendre le lot, i'n'éthait pas d'peine à vivre en moussieu pour le restant d'ses jours, mais au moment ch'est seux tch'i' n'a pas ch't' idée-là dans la tête.
Pâslant ocquo du temps, Moussieu, y'a ocquo tchiques vieillards tch'i' se r'souveinnent du grand hivé de nonante-six quand pour siez s'maines de temps tout 'tait g'lé, et nou n'pouvait pas mettre un ôti dans la tèrre. La grande gelée vint tout soudainement dans l'mitan d'janvyi, et une bouonne maintchi des patates que les fermiers avaient gardé pour la s'menche fut ruinée. A Sainte Mathie et p't'être dans l'autres pâraisses, les morts 'taient gardés dans la Salle Parouaîssiale, parsque i' 'tait impossiblye de creûser pour des tombieaux dans les chim'thièthes pour les ensev'li. Y'avait des patineurs à la Mathe au Seigneur, à Bieaumont et partout ailleurs ouèsqu'i' avait une bouonne mathe d'ieau.
A ch'teu' pour nos tchultivateurs. Ch'est bein seux que le temps que j'avons yeu chais jours n'a pas fait d'bein ès brécolis sinon pour le grand nombre tch'ont 'té pliantés tard: et nou peut garanti étout que si Jérri a souffert l'Angliétêrre et la France en ont attrapé pûs qu'nous. I' semblye que la Providence nos preserve tréjous quand j'sommes en dangi, et que j'sommes hardi privilegiés.
La Merrienne me d'mandit hier au sé quand j'avions soupé tchèsqu'i' s'en allait s'arriver quand l'fameux rapport du Comité d'Agritchultuthe veindra d'vant l's Etats.
"Quant à chu rapport" j'li dis "y'a deux choses tchi dév'thaient être certaines. Yunne est que l's Etats n'acceptéthont pas l'insémination artificielle et l'autre qu'un fermyi restétha maitre de san boeu pour bein d's années. Le restant du rapport n'est pas p't'étre de grande importance mais la grande májorité des fermiers sont drait contre les deux r'quémendâtions que j'ai mentionné et si l'Comité persiste i' pouôrrait s'trouver bein vite en embarras. Après tout, ch'est l's hommes tchi gardent des bêtes tchi dév'thaient saver tchèsque est l'mûs pour yeux".
"Oh, vèthe, sans doute" ou s'accordit, "mais l's Etats n'ont pas tréjous agi comme s'i criyaient que les gens ordinaithes dév'thaient étre consultés.
"Eh bein" ou continuit "il est grand temps tch'i' changent d'opinion. J'n'ai jamais cru comme y'en a tchi voudraient dithe que la vouaix du peuplye est la vouaix du Bouon Dieu car chonna ch'est du gniolin mais châque homme et châque femme sont mints sûs la térre pour tchiquechose, et ch'n'est pas pour être gouvernés par un p'tit nombre ou un seul individu comme Hitler et Stalin. Quand un homme veur aller trop lien, tchiquechose arrive pour l'arréter. J'n'ai jamais r'oublier lé bouonhomme Jean Lucas, le prédicateur local, tchi préchait tréjous sûs l'texte, 'Mes petits enfants, aimez-vous les uns les autres', et tchi 'tait bein aimé dans toutes nos chapelles."
"Ch'n'est pas facile d'aimer tout l'monde, ma vielle" j'li dis "I m'veint à la mémouaithe tchiques individus tchi n'sont pas du nombre de m's amins d'un bieau but. Y'a ocquo hardi de fripons dans l'monde, et je n'peux pas craithe que j'dév'thais être forchi de l's aimer. Pense au voleux tch'accatit mes patates sûs l'Bridge chutte bordée-là et tchi fichit san camp l'préchain jour avec mes sous et la femme à yun d's autres marchands."
"Oublie chonna" ou s'fit "et sais seux qu'ichin ou dans l'préchain monde il étha sa récompense".
Après chonna, Moussieu, j'nos en fûmes nos couochi. A bétôt.
Ph'lip
Viyiz étout: