Les Pages Jèrriaises

D'la Gâche à Crétons

 

Preunmiéthement, i' vouos faut des crétons. Ah ça, quand nou-s-a fondu la graisse dé couochon - l'oing et la dêsèrcl'ye (l'env'loppe des tripes) - dans un vaissé sus un feu pas trop âpre, nou la pâsse dans la coul'rêsse et chein tchi reste ch'est des crétons, et il sont bein halés ou roussis.

A ch't heu, prannez un coupl'ye d'livres d'pâte lévée (d'la pâte dé fouônnée d'pain aut'fais, sans doute), et ajouôtez-y vouos crétons par-dessus (la quantité tch'i' vouos pliaitha) atout eune tchul'lée' thée d'sé, et pis copez ch'la bein m'nu pouor dêmêler tout, crétons et pâte, et m'tez à tchuithe dans un vaissé. Les crétons sèrvent à la pliaiche dé beurre, comme amendement. Nou m'tait la gâche à tchuithe aut'fais ofûche à la r'traite du fou. D'autres la m 'taient en enfouônnant et la r'halaient un quart d'heuthe auprès quand il' êventaient l'fou

Les uns mangeaient la gâche a crétons fraîche, même acouo caude, car ou secque assez vite, n'ayant pas grand' chose dédans. Tout d'même, d'autres la gardaient bein deux ou trais jours. V'là tch'a un drôle dé p'tit goût mais est bein bouon.

Y'avait des gens tchi faîsaient chutte gâche ronde comme d'la gâche à fouée et la m'taient à tchuithe sus eune fielle dé chour, dans l'grand fou. Et d'autres étout tch'y m'taient du chucre (mais pas d'sé) et pis des raisîns.

Comme il y'a pus d'eune manniéthe à tuer un cat, y'avait étout bein seux pus d'eune manniéthe à faithe d'la gâche à crétons ! Mais, s'ous avez d'la pâte et des crétons - êprouvez-y, don, bouonnes gens, et - bouonne chance !

 

Viyiz étout:

 

 

Les Pages Jèrriaises