Jersey Wonders
|
I' nos faut pouor îngrédgients:
Bâttez bein l's oeufs dans eune p'tite bolle (pas les cruques, bein seu!). Dans eune aut' bolle, mêlez lé beurre, la flieu et l'chucre. Ajouôtez l's oeufs à la flieu etc. pouor faithe eune pâte.
Mettez d'la flieu sus vos mains et rouôlez la pâte à trais quarts d'un centimètre sus eune tabl'ye auve un p'tit mio d'flieu ou bein sus eune p'tite plianche.
Lé temps pâssé, nou rouôlait la pâte auve eune boutelle. Ach'teu j'avons not' rôllinne-pinne!
Prannez lé p'tit rond copeux et copez des ronds d'pâte. Faîtes eune cope ou deux auve un couté et touônnez les mèrvelles.
Y'a des gens tchi font eune cope, et y'a d'aut's tchi en font deux (coumme mé) ou même trais. Chenna dêpend d'la trâdition d'fanmil'ye ou d'région. Pouor dé mé, ch'est eune préféthence artistique!
Mettez un gros gobîn d'graîsse ou d'l'huile dans un sâsse-painne et alleunmez lé feu sous.
Quand l'huile est bein caûd, i' faut mett' quat' ou chîn mèrvelles à tchuithe dédans.
Quand i' sont belles et breunes, touônnez-les et après eune minnute hâllez-les auve eune tchulyi et êgouttez-les sus un êgoutteux.
I' faut tchuithe toutes les mèrvelles et i' s'sont prêtes à mangi.
S'lon cèrtains, i' faut faithe les mèrvelles duthant lé r'tithant d'la mé.
Y'a eune arrînmée du temps pâssé tchi dit:
Mèrvelle, mèrvelle,
Vînt à l'us -
Auve quat' têtes
Et quat' tchus!
N'oubliez pas à laver les vaissieaux!
Viyiz étout:
