Eune Touônnée à Dublin

Eune Touônnée à Dublin Y'a-t-i' du trafi à Dublin! Les vaituthes sont cachies bein quédaine par les rues et y'a du monde sus les trottouaithes à êprouver d'crouaîsi les rues.

Les grand' rues d'la ville sont bein affaithées, et viyant l'înmage traditionnelle dé l'Irlande, ch'est eune surprînse dé vaie des faches dé toutes les couleurs et d'ouï toutes les langues étout. Ch'est qu'la ville dé Dublin est divèrsément cosmopolitaine au jour d'aniet et les dgaingues dé touristes sont à caqu'ter et à r'garder les bâtisses et les boutiques. La boutiqu'sie est hardi populaithe ichîn étout - même si les boutiques sont les mêmes boutiques qué nou trouve dans toutes les grandes villes des Îles Britanniques - y'a les Marks et Spencer, les Boots l'apotitchi, les Body Shop, les Thornton's, les River Island, les Racing Green et tout chenna. En êffet, ch'est l's êcritcheaux dans les deux langues tchi nos ramémouaithe qué j'sommes en Irlande.

Les noms des rues sont êcrits en Irlandais et à bas en Angliais. I' sembl'ye qu'les noms Irlandais sont l'pus souvent eune vèrsion du nom en Angliais - mais quand la rue est nommée pouor un fanmeux Irlandais, bein seu, lé nom est donné dans les deux formes dé tchi l'nom Irlandais est l'originna.

Nou vait les noms des villes et les directions en Irlandais et en Angliais étout, et sus les rues les c'mîns à beusse sont mèrtchis auve “lána bus” (c'mîn à beusse).

Eune Touônnée à Dublin Les grand' rues d'la ville sont bein larges - à l'époque nou dêcidit d'êlargi les rues coumme les boulevards du Continent, et Dublin est fanmeux pouor s'n architectuthe Georgienne. Les maîsons Georgiennes sont en briques auve des belles fénêt's et des belles portes étout.

Les grands bâtisses auve les colonnes sont înmpressionants, mais y'a des bâtisses modèrnes à touos les bords étout en concrète et vèrre tchi n'sont pon hardi bieaux. Ch'est en tchi dans l'pâssé nou n'soulait pon prêsèrver les vièrs bâtisses coumme au jour d'aniet, et qu'les Dublinnais ont pèrdu un tas d'trésor d'architectuthe.

Mais y'a d'tchi întérêssant étout à Dublin. Lé vièr Livre dé Kells est gardé dans l'Collège d'la Trinneté. Y'a eune exhibition tch'explyique coumme tchi qu'ches vièrs mannuscrits 'taient faits et pis nou-s'entre dans eune salle où'est qu'nou peut vaie deux pages du Livre dé Kells et des pages d'aut's vièrs livres étout. Ch'est mangnifique dé pouver vaie d'près les couleurs et les portraits - même si nou les vait mus en èrproduction.

Ch'est întérêssant d'èrmèrtchi qué ch'fut les Nouormands tchi contchéthîtent l'Irlande - ou Dublin au mains - chent ans auprès la Contchête dé l'Angliétèrre. Les Vikings avaient envahi Dublin duthant l'neuvième siècl'ye.

Eune Touônnée à Dublin L's Irlandais d'achteu sembl'yent craithe qu'les Nouormands pâlaient l'Français, mais nou vait des noms d'originne Nouormande coumme, par exempl'ye FitzGilbert (fis Dgilbèrt).

Lé nom d'Dublin veint d'la ville fondée par les Vikings auprès d'la néthe mathe (dubh linn = néthe mathe en Irlandais) mais l'nom d'achteu d'la ville en Irlandais est Baile Átha Cliath (tchi veurt dithe pus ou mains “la ville où'est qu'nou crouaîse la riviéthe sus des fagots”)

Les mûsées sont bouans à Dublin, mais la vîsite la pus întérêssante à m'n avis est eune touônnée hors Dublin à Brú na Bóinne où'est qu'i' y'a des dolmens coumme siez nous à La Hougue Bie.

I' faut prendre lé train jusqu'à Drogheda et pis prendre la beusse jusqu'au centre ès vîsiteurs dé Brú na Bóinne sus la riviéthe Boyne. Dans l'centre y'a eune exhibition et nou peut chouaîsi des vîsites dgidées ès dolmens. Achteu y'a deux dolmens ouvèrts: Newgrange et Knowth, mais y'en a acouo un tas tchi sont à êt' dêfouis.

Y'a des minibeusses tchi cachent les vîsiteurs ès dolmens par les ruettes dé la campangne. Newgrange est l'mus connu des dolmens - à l'êtchinnoxe lé solé entre dans l'tchoeu du monûment préhistorique, tout coumme à La Hougue Bie, mais par eune boête à leunmiéthe au d'ssus d'l'entrée à la pliaiche dé par la porte même. Les muthâles dé d'hors ont 'té r'bâties s'lon les théories d's archéologistes.

Eune Touônnée à Dublin L'aut', site tch'a nom Knowth (prononcé naouth pas nôth), est mains connu mais pouor dé mé est même pus întérêssant viyant l'grand nombre dé stchulptuthes préhistoriques sus les pièrres - des louêmes, des touothâles, des cèrcl'yes, et des craîssants.