San Antonio, Texas,
U.S.A.
Lé 4 janvyi, 1975.
Moussieu l'Rédacteu,
Comme j'l'ai mentionné d'vant, nou n'peut pon battre l's Irlandais pour aver un sens d' “humour” încompathabl'ye. J'pourrais quâsi êcrithe un livre pliein d'anecdotes pour lé prouver. Nou-s-en ouait des tas dans l'couothant d'eune longue vie pâssée en grande partie en Améthique où'est qué l's Irlandais lus sont r'fugiés en grands nombres duthant les deux siécl'yes dé s'n existance comme pays îndépendant.
Ch'est un fait bein r'connu, i' m'sembl'ye, qu'en général i' sont Catholique Romain dé r'ligion, et qué dépis qué l'Pape dé Rome d'fendit à ses fidèles d'apparténîn à des sociêtés sécretes (j'pense qué ch'tait en mil huit chent septante, duthant l'régne dé Pie Neuf), la sociêté Chevaliers de Colomb fut organisée par les Catholiques Romains en mil huit chent huiptante-deux. Ouaithe tch'i' n'l'admettraient probabliément pon, j'ai tréjous pensé qué ch'tait pour rempliaichi la Francmachon'nie parmi ieux, car un tas dé ch't églyise-là en apparténaient au moment qué l'Pape abolit lus drouait d'en êt' partisans.
Eh bein, m'n anmîn Timothée. Irlandais d'vielle race qué j'ai connu pour bein d's années, mais qu' j'avais pérdu d'veue viyant tchi d'meuthait en Irlande et mé en Améthique, n'eut pon grand' chance dans la vie. Il 'tait iun d'ches-là tchi chèrchait du travas et priait l'Bouan Dgieu d'n'en trouver pon. J'rencontris un homme en ville l'aut' jour tchi v'nait d'la mème contrée l'connaîssait bein, et i' m'racontit ch't' histouaithe entouor li.
I' vînt un temps qu' Timothée 'tait sans travas et sans l'sou. Il allit vaie l'prêtre dé sa pâraisse pour li d'mander du s'cours. Lé prêtre, sachant tch'i' n'tait pon fort en peine dé travailli, et ayant fouai dans l'vièr diton qué l'Bouan Dgieu aîgue les cheins tchi s'aîguent ieux-mèmes, lé consilyit dé dithe ses prièthes touos les jours et d'aller à l'églyise rédguliéthement, et pis d'êprouver acouo à trouver du travas et s'i' n'en trouvait pon, dé prier pus raide.
Eune sémaine sé pâssit sans résultat, ch'est en tchi Timothée s'décidit dé s'adrêchi directement au Bouan Dgieu. Il êcrivait eune lettre tch'était vraiment touchante et tchi donnait un accompte dé toutes ses souffrances et ses minséthes, et d'mandant pour chînquante louis pour lî-aîdgi à s'èrmett' sus ses pids, et i' s'adréchit à “Nouotré Seigneu et Dgieu Tout Puissant, aux bons soins du Ciel” et i' mînt la lettre dans la bouaîte à lettres, sans tîmbre sus l'enveloppe.
Arrivée dans la Poste, la lettre fut ouvèrte par lé Maître d'Poste, criyant qué ch'tait un p'tit mousse tchi l'avait êcrite. I' s'adonnait qué l'Maître d'Poste 'tait un Francmachon, et i' fut si êmoué en la liêsant tch'i' l'emportit auve li à sa loge dé Francmachons et la liut en loge séante. Touos ses “fréthes” dans la loge en fûdrent êmoués à lus tou, et ouaithe qué Timothée n'était pon Francmachon i' fîdrent eune collecte sus l'coup tchi produisit vîngt-chîn louis, et la preunmié chose qué l'Maître d'Poste fit en arrivant à la Poste lé lendemain 'tait d'env'yer les sou à Timothée.
Deux jours pus tard, eune deuxième lettre dé Timothée, adréchie comme la preunmiéthe à Nouotré Seigneu et au Bouan Dgieu, aux bons soins du Ciel, fut trouvée dans la bouaIte a lettres et s'trouvit en fîn d'compte, étout comme la preunmiéthe, sus l'êcritouaithe du Maître d'Poste. Quand i' l'ouvrit, né v'chin chein tch'i' trouvit qu' Timothée avait êcrit: “Mèrcie chièr Bouan Dgieu, pour les sou. Mais la préchaine fais vouos pliaitha-t-i' mé l's env'yer par l'entréminse des Chevaliers de Colomb, car ches maudits Franmachons-là en gardidrent la maintchi!”
En sé l'vant d'bouan matin l'aut' jour, un aut' Irlandais, nommé Patrick, èrgardit par la f'nêtre dé sa chambre et vit un êléphant dans san gardin potagi. I' n'en avait janmais veu iun d'vant et n'savait pon comment qu' un annima d'mème 'tait appelé. Ch'est mème probabl'ye tch'i' n'en avait pon veu un portrait dans tchique livre viyant tch'i' n'savait ni liéthe ni êcrithe. Tout êpèrlutchi, i' téléphonit à san couosin, tch'était Chef dé Police dé la contrée, et li dit: “Vein-t'-en vit vaie l'drôle d'annima tch'est dans man gardin à pilvatchi partout. Il est quâsi aussi grand comme mén appentis, et il a eune coue dé chaque but d'san corps. Il est à êrachi mes caboches atout ieune dé ses coues et tu n'mé créthais pon si j'té disais où'est tch'il est à les fouôrrer! Vein-t'en vite vaie pour té-mème!”
La preunmié chose tchi m'vînt dans l'idée quand j'ouis ch't histouaithe-là 'tait qué l'pouorre êléphant éthait ma dans l'corps, ou n'vivrait pon gras, s'i' s'trouvait dans l'clios d'l'aut' côté d'la route dé la mangnifique boutique et tchèrpent'tie au Sieur Ph'lippe Lè Gresley à L'Êta, où'est qu' les caboches ont dgiex pid (pus ou mains) d'haut!
George d'La Forge
Viyiz étout: